مجالس الرويضة لكل العرب

ياصاحبي ياللي على وجهك ظلال
مهما تظلّل بين بوجهك النور

اقرب وجوفي لك من الحب مدهال
باقول لك عن كل خافي ومستور

مهما بدت لك حالتي ياهوى البال
انّي مع الايام سالي ومسرور

لايغرّك الهيكل ولا يغرّك الحال
الوجه راضي..! لكن الجوف مقهور

حملت قلب الذيب واقدمت رجال
دام الهموم بداخل الجوف طابور

واتعبت متنً لارتكا للحمل..! شال
وعنّيت رجلي بين غامض ومخبور

واخذت من وقتي ولوعاته امثال
مضرابها بيّن على كل مشبور

دام القمر مهما كمل يرجع هلال..!!
ماهوب عيب اليا لحق مثلي قصور

بيني وبين القمه امتار واميال
وبيني وبين القاعده عدة شهور

الرجل لو مايردف اقواله افعال
ماهوب فعيون المداغيش منظور

يابو عيونً لا ارمشة كحلها سال
خذني من اللوعات ومصادم الجور

خذني عساني فدوه لحبّة الخال
اللي تمثنت بين منحر ومزبور

وجدي على لاماك في كل الاحوال
غريم.. متشوّق ولاني بمجبور

شين المواصل من ماسنجر وجوال
وزين المواصل بين احاسيس وشعور

اقبل مبيّع ورد وابي اقبل ريال
يضبّني كفً حضن ورد وزهور

في زاوية هدو الاضاءه والازوال
ويبقى التبادل فالاحاسيس دستور

واخذ تليفونك ويتمْه الارسال
عشان مايلحق تفرّادي عثور

ولا الزمن مهما دحم يدحم ابطال
وراسي على بحر التضيّام بابور

والضيم لو انه باحاسيس رجال
ما ياخذ اصحاب التيمّان بالدور

م/ن