شقرة عصا الخلاني

ياعديل الروح لاقلت الك هرج افطن له=ماهرجت اللاّ من اللي كاويٍ وجداني
قمت قلبي كل ليله بالغرام اتّلّه=وكل ليل تشبّ في وسطه من النيراني
ان بغيت انساك نسيانك مهوب دوّله= وان بغيت رضاك انا اللي خاطري زعلاني
كل ماقلت الك ابا اظنك تداو العله=زدت علتك القديمه علةٍ بالعاني
وكل ماقلت الك مخطي قلتلي لابالله=البلا انك لاغلطت تعدّني غلطاني
لاتزل وعهد مني ماتجيك الزله=الزلل ياغايتي شقرة عصا الخلاني
الله اللي حط حبك فالحشا شغلٍ له=لين حبيتك محبة عاشقٍ ولهاني
والله اللي جمّلك وانت الحلا كفوٍ له=والحلا لوماانت كفوٍ له ماجيتك عاني
كل ماناحرت قمت اذكر عليك اسم الله=وكل ماقفّيت قمت اعوّذ الشيطاني
وكل خدٍ تنزله يفرش رضاً لك زله=ويتحفوابك على عشبه بصدرٍ حاني
ياجميلٍ حاوياً دق الجمال وجلّه=اشتهت عيني لشوفة عودك الروياني
لاتطّول فالغياب وخافقي محتله=خافقٍ حتى بطا ليله ماعاد يداني
رد نص القلب ولاّ هاك قلبي كله=لاتخليني بنص ومعك نصٍ ثاني
وجد حالي ياظريف الطول ممّاعله= وجد من حدّه زمانه للضعيف الداني
مامعه من ربعه الّلا هو عساه فداًله=واحتزم به يوم جاه الطرقي الديّاني
قال تكفى يافلان وقال لله لله=كل قرشٍ باحفظه واعيش به ورعاني
وانصفق وجه العزيز وبانت ابه الخلّه= والحق اخطاه الحسف يارب لاتبلاني
ياحبيبي لاتقربنّي حوال الذله= كل شي اللاّ اني ارضى عيشة الحقراني