قربـوا طـرس الغـلا والبنسـل الالمانـي=ناوي المسرا جنـون / ووجهتـي سرّيـه
لا شهيق / ولا زفير / امّا النَفَـس برّانـي=المشاعر .. ارض / ارض .. ورحلتي جوّيه
ابتدا قلبي يضـخ الشـوق فـي شريانـي=ليَنْ فوَّلنـي / وصـك " انبيرهـا " للميّـه
اربطوا صمام أمان / " السيت " حان الآنـي=واستعـدوا لانطـلاق الشطحـه البـدريـه
فوق متن الانفتاح / ومـا يقـول لسانـي=ينـدرج تحـت احتـرام الـراي والحرّيـه
كان جتكم نص / كم .. أو كمّهـا عريانـي=تحت " بند العولمه " / والمسأله شخصيـه
قافل(ن) جوي / واخذت التح نبيذ احزانـي=لين شفت ابراج لنـدن / غربـي الدرعيّـه
قمت انادي واتخبَّط / مـا لقيـت حصانـي=وين سيفي ؟ .. وين درعي .. عندكم عاريّه
اتعـزوى وانتخـي / شبّابـة النيـرانـي=ما دريت ان العزاوي / يـا عـرب وقتيّـه
يمكن انّي ملتمس ! والمعذره يـا اخوانـي=ويش اسوي ؟ .. والخلايا للأسف عكسيـه
لاذع(ن) مخّي / واعَرْف ان الحكي مجّانـي=والقلوب بطبعها / يا اهل الهـوى حنّيـه !
كنت اسولف ليلة الجمعـه علـى شيطانـي=واسألـه .. ليـش النوايـا كلّهـا بنيّـه ؟
أدري أنّـه كــل دان / ولا لادان دانــي=والعلاقـه بينهـم يـا سـيّـدي طـرديـه
البشر لو خلقهم واحـد / يجـون الوانـي=واختلافـه .. باختـلاف الحالـه الفنّـيـه
بس انا من خَلقتي / ما احب اكون الثانـي=واهتماماتـي محـط الـجـوده النوعـيـه
ما اطيح إلاّ وانـا قايـس جميـع اوزانـي=وحاسب حاسب الزمن والطيحـه الجبريـه
لا خذيت آخذ قدر ما اقدر / غَصَب بالعانـي=وان عطيت اعطي بكيفي / ما بهـا منّيـه
آه لو شفتوا من اللي ساكـن(ن) وجدانـي=كـان الاقـي نصكـم بالصحـه النفسيّـه
عـود مـوز ولا تهصَّـر قـدَّه الرويانـي=اقتنعـت أن الليونـه اصلـهـا فطـريّـه
والنواهـد خوختيـن / وخطهـا نيشانـي=حـد يمنـع اختـلاط الجاليـه الصـدريّـه
يا عذابـي يـوم عـض شفـاه يتحدانـي=قمت اعالـج عقبهـا / بالرقيّـه الشرعيـه
خشمها خلاني اذكـر / عصرنـا العثمانـي=وردفها طـرّى علـيّ الغطرسـه العبريّـه
لـو تتبعتـوا قصيـدي تعرفـون الجانـي=كتفـي الايمـن عليـه / الطلقـه الناريـه
عندكم رقمـي / وابعطيكـم بعـد عنوانـي=وان بغيتوا صورتي / بالمنتـدى حصريّـه
الحكي مُلْكي ما دامه / في مُحيـط اسنانـي=وأن تعدّاهـا يصـادر / كامـل المُلْكـيّـه

ممتن للرد وــالمرور
وشاكر لكِ روعهـ ــالحضور

خالص ــالود