|
الشاعر مسلط حسن العتيبي السلام عليكم ورحمة الله وبركاته من شعراء الرويضة الشباب (مسلط بن حسن العتيبي ) وصفحة مخصصة لما جادت وتجود به قريحته |
رد: الشاعر مسلط حسن العتيبي
يقول مسلـط يـا أولـي الأ لبـاب =يدير الفكر والـرأس عنـده شـاب يدير الفكر في حال نـاسٍ تغيـروا =خلـوا عبـادة ربـنـا الـوهـاب يلهون فـي دنيـاً تراهـا مغـره =لذاتهـا باكـر تـجـي ســراب عقـب المعـزه والفخـر والهيبـه =بيوتهـم عقـب العمـار خــراب الرابح اللي عنده أعمـال صالحـه =تـراه فـاز وفـي حياتـه طـاب أبطلـب اللـي ماتعـدد فضايـلـه =نرجيـه واللـي يطلبـه مـاخـاب يالله أنا طالبـك عفـوك ورحمتـك =يامعطـي الجنـه بـدون حسـاب إنـك تثبتنـا إلـى زلـت الـقـدم =وتغفر ذنوب العبـد لا مـن تـاب والموت لا من جاء ماأحـدٍ يـرده =يجـي كبيـر السـن والشـبـاب يجيك لـو إنـك بقصـرٍ محصـن =ويجيك لـو إنـك علـى المرقـاب لامت ثـم فارقـت أهلـك ومالـك =ماعـاد تنفـع عنـدك الاطـبـاب لاصرت في قبـرٍ ظلامـه يوحـش =مافيـه لا عيـشـه ولا شــراب مافيه غير الدود وسطـه يجتـول =ونصايـب ولبـنٍ عليـه تــراب تسمع قريع نعالهـم مـن فوقـك =لا قفّـوا الـخـلان والاصـحـاب إذا سأل مـن هـو نبيـك وربـك =المسلـم الصـادق يقـول صـواب والكافر المشرك يقول هاه مـدري =ويقـول ماعنـدي عليـه جـواب ثم ضرب ضربه يسمعه من حولـه =ومن قـو ضربـه تجفـل الـدواب والقبر روضه من ريـاض الجنـه =وإلا حفـر مـن حفـرة الـعـذاب لاجيت في يـوم يهيـل المرضـع =وحفظت أعمالـك كلهـن بكتـاب ماتنفـع أموالـك ولاينفـع الخـدم =وماينفعـك جاهـك ولا الأنسـاب والناس لاحشـروا يـوم القيامـه =يـوم عظيـم مابـه أحـدِ غـاب يوم عظيمٍ تدنـو الشمـس منهـم =فـوق الخلايـق كنهـا المشهـاب أحدٍ وصـل فيـه العـرق للركبـه =وأحـدٍ غـرق للأبـط والأرقـاب وعرضوا على نار تلظى سعيرهـا =الكـل خايـف منذعـر مـرتـاب وضع السـراط وكلهـم عابرينـه =ينجا منـه مـن إهتـدى وآنـاب أحد بسرع البـرق وأحـد يمشـي =واللـي وقـف جـروه بالمخـلاب عليهـا ملائكـة غـلاظ شـديـده =فـي يدينهـم سلاسـل وإحـراب أهـل جهنـم فـي عـذابٍٍ دايــم =مخلـديـنٍ مالـهـم مـجـنـاب نارٍ حطبها الناس هـي والحجـاره = وقـودهـا للكافـريـن عـقـاب وأهل الجنان الخضر فـازوا فيهـا =بالحور والسنـدس وخضـر ثيـاب وبيوت من لبن الذهـب والفضـه =وأنهـار وخيـامٍ عليهـا أقـبـاب وشربوا من الكوثر شـراب طيـب =مـن سلسبيـل بآنيـه وأكــواب وأشجار طوبى وفاكهـه ماتحصـى =فيها ثمـر تيـن ونخـل وأعنـاب ماهيـب مقطوعـه ولاممنـوعـه =أثمارهـا كــلٍ لـهـا طــلاب أبنصح اللـي فـي حياتـه غافـل =قبـل يمـوت وتسلـب الاسـلاب صل الفرايض كلها فـي المسجـد =خلك مع أول من يجـي المحـراب ثم حـج بيـت الله إذا كنـت قـادره =مادمت حـي ومنفتـح لـك بـاب وإتق دعاء المظلوم لاقـام يدعـي =ترى دعـاء المظلـوم مستجـاب وأكل الرباء مثل الذي ينكـح أمـه =تـراه مثـل الرجـس والأنصـاب ولا تأكـل أمـوال اليتامـى خلهـا =إن كـان تبغـى الأجـر والثـواب وابوك وامك واجـب إنـك تبرهـم =واسمـع كـلام الدايـم الـتـواب ولاتـقــل أ’فٍ ولاتـنـهـرهـم =علـك تفـوز بصحبـة الخـطـاب ولاتقطع الأرحـام يقطعـك ربـك =خلـك وصـول تاصـل الأقــراب والجـار لاتنسـاه عطـه حقوقـه =وفـه حقوقـه وأبـذل الأسـبـاب واترك كلام الناس والهرج في القفى =ولاتتـبـع النـمـام والمغـتـاب خلك مع الصادق يدلك على الهـدى =واتـرك طريـق الفاجـر الكـذاب واختامها مني صلاة علـى النبـي =علـى محمـد سـيّـد الأحـبـاب الشاعر /مسلط العتيـــــــبي |
رد: الشاعر مسلط حسن العتيبي
أرتاح فـي ديـرة خوالـي وجـدي=لو ماأهتني فيها من الـزاد مطعـوم خليتهـا يـانـاس مـاهـوب ودي=شي مقـدر فـي حياتـي ومقسـوم يانـاس خلونـي لا أبيـح بـسـدي=وأقول شي داخـل الصـدر مكتـوم أبكي ودمعـي سايـل فـوق خـدي=على الديار اللي بها أطلال وأرجـوم شوفي لها عـن كـل شـي يسـدي=وفـي حبهـا والله مانيـب مليـوم ودي بـداري لكـن الوقـت ضـدي=قاسي وغيره ضيقة الصدر وهمـوم الــدار داري غيـرهـا مانـبـدي=ودي بها لو حالوا الفـرس والـروم والله ما أتركها وعنهـا مـا أشـدي=ولو ساوموني فأرضها ما أقبل السوم بوصيك يالمرسـول ياللـي تـودي=ود العلـوم الطيبـه دايـم الــدوم لأهل الكرم والطيـب والعـود نـدي=ذباحـة الخرفـان والفطـر الكـوم وقت الشدايـد والمحـن ماتصـدي=فزاعة في الضيـق نطاحـة القـوم يـا لا يمـي فيهـا تراهـا مـردي=باعيش فيهـا دام ماقيـل مرحـوم |
رد: الشاعر مسلط حسن العتيبي
ياراكب اللي لا مشى ماتهـزز=جيبٍ جديدٍ مشترينـه وكالـه سايق دركسونه مكرّم معـزز=طيّب وطيبه ماخذه من خوالـه لادق سلفه ثـم شغّـل وقـزز=ذا مكسب الرجال من راس ماله فكسار وإلا من طرازات لكـزز=كـل المواتـر مالقينـا بدالـه ملفاه قرمٍ للضيـوف إيتـرزز=من نسل شيخ عامراتٍ دلالـه |
رد: الشاعر مسلط حسن العتيبي (( ديرة خوالي )) (( ديرة خوالي ))
يانديبي جهز الجيب وأمله بالوقود =وأطلب الله في الخفا تنفتح بيبانها إطلبه لازل ثلثين والعالم رقود =كل نفس مذنبه تطلبه غفرانها جهز الموتر قبل لايبيحن السدود =وكل ناس يانديبي تحب أوطانها بنحر ديار عزيزه ورى ذيك النفود =الديار نعزها من غلا سكانها ديرتي ديره خوالي عريبين الجدود =السهول أهل الكرم مكرمة ضيفانها الكرم عاداتهم من على عاد وثمود =والرساله للعرب بينن عنوانها جعلها للسيل من عقب زلزال الرعود =جعل سيل الوسم يمطر على ريضانها والخزامى والنفل ظاهر فيه الورود =والفياض المزهره ينطحك ريحانها شوفتي للدار يبرد لواهيب الكبود =والعيون اللي حزينه تروح أحزانها وأنا ربعي تذبح الحيل والعالم شهود =لابتي وقت اللقاء تحتمي عربانها الشاعر/ مسلط حسن العتيبي |
رد: الشاعر مسلط حسن العتيبي (( خرص )) (( خرص ))
ألا ياجبال شامخه في علاوي نجد =تعلك مزون الوسم صبح وعصريه تسقيك لين القاع ينبت زهور وورد =تشوف الخزامى والنفل في علاويه على شامخ من قبلنا قال فيه العبد =ترى القصر مودعكيه وأحفظ مبانيه وألا ياهضاب نايفه عاش فيها الجد =تربى تحت ذيك الهضاب الجنوبيه تمثل بها علي الشنيفي وجاب الرد =وجاب القصيد اللي قويه معانيه إلى جاء بعال الرجم تبرد عليه الكبد =وتبرد لواهيب على الصدر مخفيه مثل قول بن قطنان من يوم عنها شد =وخلى القصر والزرع وأهمل سوانيه على شان حاجات تقصر طويل اليد =ظروف الحياة اللي عليهم قصاويه وأنا مثلهم لاشفتها باح كل السد =أهوجس ودمع العين مافيه ماويه أهل العباري لين تنساح فوق الخد =على ديرة من عقب أهلها خلاويه وأنا احبها والحب في القلب ماله حد =تربيت فيها والمحبه بلاويه ولاعاد فيها غير ذاك الحمام الربد =حمام السوادي ساجع في غناويه الشاعر / مسلط بن حسن العتيبي |
رد: الشاعر مسلط حسن العتيبي (( خرص )) (( خوي النشاما ))
ياربعنا ياللي علي ماتدقون =رحتوا وخليتوا خوي النشاما أنا بوسط الدار وانتم تمشون =وأنا كلاني ياعربنا العراما أحبكم في الله وابليس ملعون =إعداد من صلى وزكا وصاما بشري مخاواكم ولو كان مليون =خوة نشاما ماعليها الكلاما ومادام رحتوا في ذرا خالق الكون =اللي حمى البيت الحرم والمقاما في كل يوم بأتصل بالتلفون =وأخذ أخبار الطيبين الحشاما لكن الى دقيت لازم تردون =عشان مني مايجيكم ملاما أبا اتعلمكم وبالحال تدرون =حالي خطيره من غزال العداما حالي تراها عقبكم دون في دون =مثل الخلوج اللي ذبحها الهياما تكفون مروا ديرة العز تكفون =ماهوب لاعيب ولا هو حراما مروا على ابها كان تبغون تبطون =ذيك الجبال اللي عليها الغماما تبردوا في جوها لاتعجلون =في ديرة ماهيب شرق وشاما والى مشيتوا خلوا المشي بالهون =معطلين ولا وراكم دواما روحوا على جيزان يمكن تصيدون =فيها الأرانب والوبر والحماما دار الى رحتوا لها ماتملون =ياليت من جاء دارها كل عاما أكن في قلبي مثل ماتكنون =وهذي تحيه خاطري والسلاما الشاعر / مسلط العتيبي |
رد: الشاعر مسلط حسن العتيبي (( عالي المشراف )) (( عالي المشراف ))
قاله اللي بادي في عالي المشرافي =يطلب اللي في السماء كل الملا يرجونه كافر بالجن والكهان والعرافي =ومومن بالواحد اللي ماتنام عيونه ومن بنات الفكر حضرت وبدعت القافي =من بيوت جزلة(ن) قيفانها مازونه الزمن ذا الوقت شاين والسنين إعجافي =مثل عد ناضح في القيظ مايردونه مالقيت الطيب الصنديد في الميقافي =ومالقيت اللي ليا جاء العلم يثني دونه ومالقينا في زمنا ذا صديق وافي =لا زهمته قام غطاء قلته بردونه شفت لي ناس ضعيفه والعقول إخفافي =باعوا الطيب وراحوا للردي يشرونه ومن تكبر لا يحسب إنه من الأشرافي =عايش في دنية ماهيب له مامونه وإلا أنا بمد رجلي لين حد إلحافي =يوم بعض الناس يطرد من ورى مليونه مانبا إلا العافيه والستر جعله ضافي =والغني ويا الفقير أبدانهم مدفونه قلتها ماهمنا اللي قدمنا وإخلافي =وكلنا في رحمة اللي منشي إمزونه وأحمد الله ياجماعه ماعلي إخلافي =دامني مستور حال وسمعتي مصيونه الشاعر / مسلط العتيبي |
رد: الشاعر مسلط حسن العتيبي (( أهل المصالح ))
أصون نفسي وأداريها عن المنقود والعيب=واخشى عليها من النمام يلحقها بنمه أببذل الطيب وأجزي فاعلين الطيب بالطيب=وأصبر على اللي يجيني من طوارفها مذمه من كثر ما أصبر على العدوان بان براسي الشيب=صبرت جعل الولي يفرج عن المهموم همه أشوف ناسٍ كثيره ما يعرفون المواجيب=معروفنا لا بذلته ينطلونه في المقمه وقت تغّير وصار به الثعل أطيب من الذيب= والكلب جاله مواقيفٍ وفزعاتٍ وهمه والصقر حول عقب ماكان في روس المراقيب=والبوم وكّر محله شامخٍ في راس قمه وأهل المصالح تجيك بطيب وبحلو الاساليب=يضحك بوجهك ويأخذ حاجته بخف دمه وإلى خذا المصلحة دبّر ولقّاك العراقيب=ماعاد يبغاك لوإنك مثل خاله وعمه أبطلب الواحد اللي عالمٍ بالسر والغيب=اللي خلقنا ودبرنا وعنده رزق الامه تفرج لمن هو حفت يمناه من كثر المكاتيب=يبكي ويمسح دموعه ياعرب بأطراف كمه دنياً تقلب على المخلوق ماتصفى المشاريب=يومٍ قراحٍ زلال ويوم عكرٍ فيه سمه والموت لاجاء البنادم ما تفيد به التطابيب=يجيه في ساعةٍ غافل عنه ما هوب يمه الشاعر/ مسلط بن حسن العتيبي |
رد: الشاعر مسلط حسن العتيبي (( القولون والمعده )) (( القولون والمعده ))
أبطيت أعاني من القولون والمعده =ولا لقيت العلاج اللي يداويني علاجهم لا كليته صابني رعده =وأخذت وجعان والخاطر غدا شيني تكودني وقفتي وتكودني القعده =والصدر ضايق ومختلفه موازيني ورفعت أيديني تضرع للولي وحده =عساه لامن رفعت أيدي يشفيني يالله يالله ياللي صادق وعده =ماهوب كذاب مثل الصدر وخميني يامنزل الغيث من برقه ومن رعده =محيي به الأرض عقب امحالها سنيني يامغرق في البحر فرعون مع جنده =وموسى وقومه من الأمواج ناجيني أبطلب الواحد اللي ناصر عبده =في بدر وحنين والخندق وحطيني إنك تشافي مريض ضاعف جهده =وتشفي بقدرتك كل اللي مريضيني أنا الفقير أسأله وأرجي عطا مده =عساه للحق والخيرات يهديني والختم صلوا على من لا نبي بعده =محمد المصطفى سيد النبييني الشاعر/ مسلط العتيبي |
رد: الشاعر مسلط حسن العتيبي (( فتاة المملكه )) (( فتاة المملكه ))
الراس شاب وتوني ياناس في عز الشباب =من كثر ماجربت واللي جربوا شابوا بها نمشي ورى الدنيا كما الضميان لاشاف السراب =وسط الخلا يبغى غدير صافي مشروبها لكن جاه الموت وأثر الموت في في الرقاب =ياكثر ناس مثل حاله ماخذت مطلوبها تجري مثل جري الوحوش ولاتحوش إلا النصاب =أحد رضى باللي كسب وأحد جحد ماجوبها والناس ماترضى إلين تحط من تحت التراب =الموت يرضيها ويستر سدها وعيوبها وحنا بوقت كل علماني يبي نطل الحجاب =يبغى فتاة المملكه تكشف وتنطل ثوبها يبونها تلبس جنوز من عقب لبس الثياب =وتظهر مفاتنها وزينتها وحلو إسلوبها وتسوق في وسط الشوارع والصحاري والشعاب =وتلقى شباب فاسد بسلوبهم لعبوبها وجابوا لنا علم جديد جالب كل الخراب =أعياد حب كل محبوبه مع محبوبها وكثرت ذنوب تنجلي منها مخاييل السحاب =من عقب ماتبرق وترعد ماتهل نصوبها والله يستر لايجينا من سبايبهم عذاب =من قبلنا راحت شعوب من فعول ذنوبها واليوم عيت لاتشوف أبصارنا الحق الصواب =ضاقت فجوج الأرض وأنسدت جميع دروبها لازم نعود للحديث وكل مايحوي الكتاب =من شان ناس عايشه والشر وسط قلوبها ماهمنا اللي قاعد ينبح مثل نبح الكلاب =لا يحسب إنه مثل أسود كشرت بنيوبها وأخر كلامي بطلب الرحمن في يوم الحساب =تغفر ذنوب المسلمين بشرقها وغروبها الشاعر / مسلط بن حسن العتيبي |
رد: الشاعر مسلط حسن العتيبي (( الاستجاره )) (( الأستجاره ))
يالله يالملتجأ أنت السميع البصير=قدرتك فوق الذي تفخر بقدراتها ياكاشف الضر ياجابر عظام الكسير=ياخالق الخلق ياعالم بنياتها يالله بعفوك ولطفك تنصر المستجير=في ساعةٍ يستجيرك من مغباتها نمشي على الارض ماندري وش اللي يصير=في غفلةٍ عايشينٍ في ملذاتها نسرح ونمرح ولا نسمع كلام النذير=ونقلّد اللي طغى ونسوي سواتها ونقول بنتوب لله العلي القدير=ونطاوع النفس ونتبع كل شهواتها يقودنا إبليس للفتنة بسلك الحرير=وننقاد له لين طحنا في مهفاتها ومن طاح ماله من الدنيا معين ونصير=راحت حياته جحيم وذاق لوعاتها ما كتب للعبد ما عنّه مفر ومطير=يالله دخيلك من الدنيا ونكباتها يالآدمي إنتبه والهرج خله قصير =دنياك حسّب دقايقها وساعاتها يالله بعفوك وغفرانك الى جاء المصير=ويوم القيامة ترى بانت علاماتها ياالله تنجّي عبادك من عذاب السعير=في ساعة ما تفيد الناس حسراتها نارٍ تلظى لها تحتك شهيق وزفير=خلك مع اللي نجأ من حر لفحاتها يالله بجنات عدن اللي نهرها غدير=وقطوفها دانياتٍ من نباتاتها وصلاة ربي على الهادي الرسول البشير=اعداد ما حسّب التجّار ثرواتها الشاعر / مسلط بن حسن العتيبي |
رد: الشاعر مسلط حسن العتيبي (( ياسيف )) هذي القصيده مهداة للشاعر/ سيف بن محمد الشنيفي (( ياسيف ))
بشكي على الله ثم بشكي على الخال=من واهج بالصدر ما أحد درابه ياسيف قلبي صايرٍ فيه ولوال=ودموع عيني مثل وبل السحابه شكيت لك ياسيف ياطيب الفال=يومن لك قدرٍ كبير ومهابه ياسيف دمعي من على وجنتي سال=من سبة اللي راح وأقفت ركابه من دون خلي قفل الباب بأقفال=وكم مرة ياسيف مريت بابه من أول أشرب ياعميلي من إزلال=واليوم صافي الماء تعكر شرابه في كل يوم أرسل لهم كم مرسال=والزين عيا لايجيني جوابه صبرت لكن الصبر ياولد طال=والصبر مر ولا لقيت الدواء به مير البلاء شوف أدعج العين قتال=والموت يوم الوقت كشر بنابه لا جاني المجمول بارخص له المال=وان راح جعله يهتني في شبابه من لامني ياصاحبي في هوى البال=جعله من اللوعات ينقل صوابه الشاعر / مسلط بن حسن العتيبي |
رد: الشاعر مسلط حسن العتيبي (( يابو حسن )) هذي القصيده ردا على الشاعر/ مسلط بن حسن العتيبي (( يابو حسن ))
جتنا البيوت اللي ترادف بالاقوال=من شاعرٍ يقنب قنيب الذيابه يشكي ويشرح لي غلا سمح الاقبال=حبه عذاب له وبعده عذابه والله مانذخر وتفداك الانذال=يابو حسن ماعاد فيها اطلابه الوضع واضح دون تفسير وجدال=الوضع شخصي عند حضرة جنابه لكن مالك حل ياذرب الافعال=إلا الصبر والصبر يرجى ثوابه ودعوة إله الكون علام الاحوال=يصخر لمن حبه بقلبك لجابه وإما حصل فابعد عن القيل والقال=خذيت معه اللي يكفي غيابه وأنا بقلبي جرح والجرح مازال=ينزف ياخو سلطان محدن درابه أربع سنين وعشر وهمومي اثقال=مثل الذي يطرد بقيضه سرابه ماعاد لي يم أريش العين مدخال=يابو حسن مقطوع حبل الرجى به الشاعر / سيف بن محمد الشنيفي |
رد: الشاعر مسلط حسن العتيبي (( قبلان )) (( قبلان ))
توكل على الله وأركب الجيب ياقبلان=نبي ديرة ربي من العشب كاسيها على موتر توه جديد من اليابان =يدوج الديار اللي من العام ناويها ألا يانديبي وجه الجيب للصمان =ديار بعيده تطرب اللي مشى فيها نبي شوفة العشب الأخضر داخل الريضان=فياض حقوق الوسم توه مسقيها طرات العمر لا رحت تمشي مع البران =بعيدن عن الديره ولجة بواريها تزيد العمر والنفس في دبرة الرحمن =وكل يبي نفسه تحقق مشاهيها أبا أدوج لين أظهر على وادي العجمان =وعلى الدبدبه والديره اللي تواليها وأعود يسارن للحفر ديرة المطران =وناخذ لنا يومين فيها بلياليها أبي خوة اللي فعلها في المواقف بان =رجال على الشدات تطلق عزاويها خوي الوفاء بشريه لو غليت الأثمان =وخوة ردي المعرفه مالنا فيها الشاعر / مسلط بن حسن العتيبي |
رد: الشاعر مسلط حسن العتيبي هذي القصيده مهداة لنا من الشاعر/ سعد بن محمد الشنيفي ( ذعاذيع الهبايب ))
يا ذعاذيع الهبايب يانسانيس الشمالي=يالبروق اللي تلوح ويالرعود اللي تدني يامسا الخيره وهاجوس السعد في كل حالي=آه يالهاجوس مدري ليش دايم ممتحني مير ابنصى صاحب غالي ومهما غاب غالي=خابره لو طالت الأيام دايم عند ظني ويش حيلة صاحبك " يصلاه وسط القلب صالي=اطلع المرقاب أغني وانزل المرقاب أغني يالعتيبي دارت الايام هي ويا الليالي=وفرقت شمل الاصاحب ليه يادنيا التجني كل وقت كان حالي بس ياعزي لحالي=يوم كنا فالديار اللي عساها ما تسني ياعسى حقوق المطر تسقي ثراها والجبالي=ديرة أهل الطيب والنوماس ما فيهم متني والله ان رفقة هل الطالات عندي راس مالي=وانت لي مكسب ولا انسى صاحبي لو غاب عني الشاعر/ سعد الشنيفي =============== =============== ========== هذي القصيدة ردا على قصيدة الشاعر/ سعد الشنيفي (( ياسحايب ))
ياسحايب هلي حقوقك على ديرة خوالي=ديرة خليتها والقلب عيا يرجهني ياسعد هيضتني وأنا من أول كنت سالي=والليال السود دايم للعرب مايرحمني يالشنيفي تشتكي وأنا مثل ماجاك جالي=والليالي يالشنيفي بالهواجيس أشغلني ماجحدنا الطيب كله ياكريمين السبالي=ومن جحد طيب الرجال اليوم جعله مايثني مرحبا بك ياسعد لاجيت ياقرم الرجالي=أبشر برجل يشيل الحمل كله مايوني بفزع بحالي ومالي ياسعد ويا العيالي=والمعزه والغلا في وسط قلبي تستكني قدركم في الصدر عندي واهبه رب الجلالي=ماتغيره السنين اليوم لو هن يمحلني وياسحايب سيلي ديرة خوالي والمفالي=وأنعشيني بالحقوق اللي مزونه يرعدني الشاعر/ مسلط العتيبي |
رد: الشاعر مسلط حسن العتيبي (( الهنوف الطموحي )) (( الهنوف الطموحي))
تكفون يالاجواد خلوني أشوف=خلوني أشوف الهنوف الطموحي ياصاحبي طالبك في حالنا روف =وإذا غلطنا فالعذر والسموحي أبو عيون أوساع وخدود وردوف=ومبيسم فيه الثنايا الذبوحي وأبو جديل فوق الأمتان مصفوف =شقرن ودهن العود منها يفوحي وخصره نحيل وورك والساق ملفوف =لاشفتها روحي خطيرن تروحي في حبها كني عن الناس مصروف =أبكي وأصد ودمع عيني فضوحي لاسلهمت في عيونها رماح وسيوف =من صابته قام المشقى ينوحي عبرت عن حبي بأحاسيس وحروف =وخطر على العاشق لسره يبوحي مانيب في طرد المقفين مكلوف =أبا أتركه يمكن تطيب الجروحي الشاعر / مسلط بن حسن العتيبي |
رد: الشاعر مسلط حسن العتيبي (( مكسور المعارك )) (( مكسور المعارك ))
ياونتي ونة اللي طاح في وسط المعارك =من فوق راسه طيور الحوم قامن يكسرني مكسور ساقه ولا يقدر يقوم وطاح بارك =والليل ضاويه وذياب الخلاء حوله عوني على وليف خذا قلبي وفي روحي مشارك =عيوني القشر من فرقاه دايم يسهرني يازين ياللي تتل القلب وأنته وسط دارك =عقبك دموعي على الخدين قامن يذرفني آمر تدلل تراني من يمينك ليسارك =حالي ومالي تراهن في رضاكم يرخسني أشغلتني في وصالك بين جناتك ونارك =وأشقيتني والليالي في فراقك عذبني لا لا تغلا تراني يالطيف الروح جارك =والجار واجب على جاره يزوره يامضني دمرت حالي ترى حالي عماره من عمارك =جتني سهوم المنايا عقب ماقفيت عني الله يجمع مساري ياحبيبي مع مسارك =في تالي الوقت واللي راح جعله مايثني الشاعر / مسلط بن حسن العتيبي |
رد: الشاعر مسلط حسن العتيبي (( ياطير )) (( ياطير ))
ياطير ياللي بالجناحين تخفق =قلبي عطيب بين الأضلاع خفاق مثل جناحينك ليا قمت تصفق =لاطرت ياطير السعد وقت الأشراق بأوصيك لاجيت أريش العين ترفق =وتخبره باللي حصل عقب الأفراق قله تراني عقب خلي مصلفق =صلفاق من ضاقت دروبه والآفاق أنا على شوف أدعج العين مشفق =على الذي مادوجت وسط الأسواق أصل وفصل ماهو من اللي ملفق =أبو خدود كنهن بيض الأوراق عقبه دموعي فوق خدي تدفق =مثل غزير السيل في وسط مخناق إن راح جعله في حياته موفق =وإن جاء تراني دايم الدوم مشتاق الشاعر / مسلط بن حسن العتيبي |
رد: الشاعر مسلط حسن العتيبي (( عنا الوقت )) (( عنا الوقت ))
دقوا علي في ليلة مابها نور =وقالوا تعال وعندنا لك علومي وساعة وصلت وقلت ياسعود ماجور =عطاني علوم سوات السهومي سهم على قلبي وسهم على الزور =سهوم تقتلني ولا به رحومي قال البني واجد ومليانه الدور =يمكن تحصل من يسد اللزومي وبكيت يوم أني سمعته على الفور =ومشيت دمعي ياعرب بالكمومي أظلم سماي وكني اليوم مقبور =ساعه سمعته قمت أعمعم وأعومي والقلب كنه يشتعل فيه دافور =والكبد يلفحها لهيب السمومي كني عطيب بأسفل الساق مكسور =أسهر وغيري في فراشه ينومي في معزل كني عن الناس مجدور =أنوح تالي الليل وأنطل هدومي عزالله أني من عنا الوقت مقهور =أبكي ولابه من يقوي عزومي دنيا علينا قامت تجور وتدور =في القايله قمنا نحسب النجومي يالله ياللي في يده نفخة الصور =ياللي على المخلوق رزقه يدومي تفرج لمن حاله مغربل ومخطور =ماعاد يقدر ياجماعه يقومي ومن عافنا عفناه لو هو من الحور =والنفس عن كل الرذايل تشومي وقفى وقفينا ولانيب مسرور =وطلبت من ربي يزيل الهمومي الشاعر / مسلط بن حسن العتيبي |
رد: الشاعر مسلط حسن العتيبي (( عزة النفس )) (( عزة النفس ))
البارحه مارقدنا من كثير الهموم =قعت أهوجس وغيري نامت عيونها أسامر الليل كله وأرتقب للنجوم =لين العصافير قامت تزعج ألحونها أون كني كسير الساق وإلا محموم =من علة في ضميري مايداوونها حنا نعرف الرجال الطيبه والرخوم =وأميز الناس صاحيها ومجنونها وأعز نفسي عن الحاجه وبعض العلوم =وأخشى من الزمره اللي تضحك سنونها لكن بعض العرب في الطيب عيا يقوم =ماهوب مثل الرجال اللي يشيلونها ترى الشدايد تبي واحد قوي العزوم =يشيل كل الصعاب وينثني دونها لا أهتم من حاجتك ماعاد يقدر ينوم =يفزع بجاهه إلين يجيب مضمونها وإلا أنت مالك نصيب من فعول القروم =والخيل تبغى رياجيل يعنونها معروفك اللي بذلته ماتركته يدوم =وجميلتك خلها للي يصونونها إغلطت غلطه كبيره كبر ضلع الجثوم =ماتمحي والعرب ماعاد يمحونها تذل نفسك بنفسك ماتعرف السلوم =وسلومنا كل خلق الله يعرفونها والمرجله ماتباع ولا تقدر بسوم =بعت المراجل مثل ناس يبيعونها وينك عن اللي إلى منه وقف في اللزوم =يعتق رقاب على الساحه يقصونها يعز نفسه وعن كل الرذايل يشوم =مايأخذ السعي مثل اللي يسوونها إلى نخيته يشمر عن يديه الكموم =ويطلق عزاويه لين الناس يوحونها ويهد هدة صقر ماهيب هدات بوم =وسيوفهم في الخطر دايم يسلونها ياقف مواقيف من ذرا لهيب السموم =ويعد فعله مع ناس يعدونها والأجر كل يبيه ولاتصير محروم =والله ومر بالأمانه لا تخونونها وإن كان ماانته بسباح وتقدر تعوم =خل الشواطي لأهلها اللي يرودونها الشاعر / مسلط بن حسن العتيبي |
رد: الشاعر مسلط حسن العتيبي (( القسيمه )) (( القسيمه ))
مافادني شيل البطاقات في الجيب =في كل يوم ماخذ لي قسيمه وترى القسايم ياعرب مابها عيب =العيب في شذب القفى والنميمه المشكله ماعندهم واحد ذيب =حتى يخلينا نروح بحشيمه مغير (........) قليل المواجيب =مافيه لاحشمه ولافيه قيمه عسى حياته كلبوها تعاذيب =ولامات يحرمه الجنان النعيمه والله لو لا بدلته والمعازيب =لا أحاسبه في التاليه والقديمه الشاعر / مسلط بن حسن العتيبي |
رد: الشاعر مسلط حسن العتيبي (( أبو ثنين )) هذه القصيده مهداة للشيخ / مسلط بن شعيفان أبو ثنين السبيعي
أبا أبدا بذكر الله وأسلم على بو ثنين =على الشيخ مسلط جعل الأنذال يفدونه سلامي على مسلط عدد من سكن بالصين =وعدد وابل الوسمي ليا هلت مزونه انا أسمع بصيته مير أبي شوفته بالعين =قبل لا يحيل الموت يالربع من دونه تنشدت عن مسلط ودلوني الذربين =وقالوا ترى كل المناعير ينصونه فرح خاطري باللي سمعته عنه ذا الحين =وقبلي طحاطيح الرياجيل يطرونه نبيع الرخوم ونشتري خوة الغالين =مادام إن روحي مع هل الطيب مرهونه عزيز الجناب وصامد في العسر واللين =يجي ثابتٍ مثل الجبل ما يهزونه يجي فزعةٍ للي عشرهم تجي ثنتين =وهداج تيماء يروي اللي يرودونه من اللابه اللي دايمٍ بالكرم ضارين =زحول الرجال وجارهم مايضدونه هل الماقف الطيب هل السيف ابو حدين =على قمة التاريخ والمجد يبنونه هذولا هم الغلبا هذولا هم الصلفين =نهار المزاحم حوض الأقدار يردونه هل الجيش وأهل الخيل لطامة المخطين =كعام الخصيم وكل طامع يردونه مدحت السبيعي والسبيعي من الوافين =ىومن يمدح الطيب حشى لاتلومونه سمعت القصيد وشاقني بالكلام الزين =بيوته عن الزلات والنقد مصيونه مثل ما بدينا بذكر اللي حمى البيتين =جزيل العطايا والمخاليق يرجونه الشاعر / مسلط بن حسن العتيبي |
رد: الشاعر مسلط حسن العتيبي (( موعظه )) (( موعظه تتحدث عن أحوال الناس في الدنيا والأخره ))
مسلط تنقى من قوافي بحورها =جزل المعاني كاتبه في سطورها أبطلب الله ثم أصلي على النبي =وابا أستعيذه من عظايم شرورها يالله ياللي تعلم السر والخفى =سامع دبيب النمل بأقصى جحورها ياخالقٍ الخلق كله من العدم =علام ماتظهر وتخفي صدورها يارافعٍ سبعٍ وسبعٍ بسطها =ياشافي المرضى وجابر كسورها تغفر لعبدٍ يرتجي منك رحمه =رحمتك يرجيها ويرجي غفورها فكرت في الدنيا وفكرت في أهلها =لقيت أهلها عايشينٍ بغرورها لقيت ناسٍ في المجالس هذوره =غطت على المجلس بكثرة هذورها تمدح لها ناسٍ وناسٍ تسبها = هذي سوالفها إلى جاء حضورها ناس على كسب المعاصي حريصه =تشوفها مختلةٍ في شعورها ولقيت ناس تاكل السحت والربا =هذا تعشابه والآخر فطورها وناس بعد تأكل حلال اليتامى =تبيع ذمتها وتشهد بزورها تبطش بيدها ماتحسب لكسبها =ماهمها لو كان هذا فجورها لاجاهم المسكين محتاج حاجه =صدت عنه وأبدت بوجهه إعذورها ماتنفعه لو كان منها قريب =تقول جعله دايم في ثبورها والشجره اللي ماتظلل وتثمر =ودك من القاعه تقطع جذورها هذا زمان الكلب والهر والثعل =والبوم وكر في مواكر صقورها دنيا تقلب كل يوم وليله =هذي لياليها وهذي شهورها يوم تبكينا ويوم تسرنا =ماينعرف مسنادها من حدورها واليوم وين اللي ربوا في فجوجها =ماتوا عن الدنيا وراحت عصورها راحوا رجال العز والطيب والكرم =اهل الشجاعه وافيات شبورها عاداتها للضيف دايم ترحب =وتعطيه مافي يدينها من هجورها الى ذكرت فعولها هل دمعي =بكيت لين الكبد تبرد حرورها لاجاك يومك ماعن الموت صده =لابد مانرحل ونترك قصورها ونسكن قبورعقب ذيك الوسيعه =والموت حق ولازم إنا نزورها حياة برزخ بين نار وجنه =في القبر لين الله يأمر نشورها يالله يوم الحشر تنجي عبادك =لابعثرت كل الملا من قبورها لاجاء نهار فيه الأبصار شاخصه =ترجي كريمٍ لاوعد مايبورها أحدن خذا كتابه بيمناه وأفلح =وأحدن بيسراها وقافي ظهورها ترى العمل نورك الى قمت تمشي =على السراط وكل ناس بنورها أحدن بنوره نور الدرب كله =وأحدن بظلمأ نورها في ظفورها ناس تمره كنها لمحة البصر =وناس على الصراط صعب عبورها هذي جهنم تاكل الناس والحصى =طويلةٍ عريضةٍ في قطورها يطيح فيها من عصى الله وأشرك =أهل النفاق تطيح بأسفل قعورها ومن آمنوا بالله وأوفوا بعهده =مأواهم الجنه وفازوا بحورها أقول قولٍ جعل ربي يثيبني =جعل الولي في الصحف يكتب اجورها والختم صلى الله وسلم على النبي =إعداد ماهلت ونبتت زهورها الشاعر/ مسلط بن حسن العتيبي |
رد: الشاعر مسلط حسن العتيبي (( هملاجة العين )) (( هملاجة العين ))
إلى هملجت عيني على النوم ياسلطان =يجيها بلاها لين من نومها تاعي وأهل العباري لين تدرج على الأوجان =على اللي غلاها لاجي بين الأضلاعي على صاحب ماشفت زوله مع العربان =ولاذيع صيته يوم الأخبار تنذاعي حسين الوصايف لابكاسي ولاعريان =عليه الله أكبر صاحبي زين الأطباعي تحدتني الأقدار في تالي الأزمان =وعود زماني وقت من عقب مرباعي عسى الله يصبرني على قسوة الخلان =لي أربع سنين والغضي مابعد طاعي وأنا عقبها مانيب طيب ولا وجعان =من العام لين اليوم ماطابت أوجاعي على اللي نهوده كنها طلعة الرمان =على صاحب من دون شوفه قصر باعي بحور تصافق والسفينه بلا قبطان =سفينه غرامي تايهه مالها شراعي ولا أنساه دام الجسم مالف بالأكفان =وراسي يشم الريح مادفن بالقاعي الشاعر / مسلط بن حسن العتيبي |
رد: الشاعر مسلط حسن العتيبي (( الرساله )) هذه القصيدة مهداة للشاعر/ محمد بن سعود بن حويل السهلي ( أبو نايف ) (الرساله)
هاك الرسالة مرفقه بالتقارير =رسالة فيها علوم خفيه رسالة تقصر علينا المشاوير =والحل عندك يازبون الونية قمنا يابو نايف ندير التفاكير =واخذ مع التفكير روحه وجيه الجو عقب الغيم عود معاصير =صار البراد اليوم نار حميه والقلب كنه يشتعل به دوافير =من حر ماونس فيه ذقت المنيه بانخاك ياللي ماتعد المخاسير =ياللي على الطولات رجلك جريه انته كريم من قروم مناعير =عليك يامحمد بسوق المطيه وانته عضيدي في الليالي المعاسير =افزع ترى كلاً غدر به خويه عطني علومك ياولد والتباشير =يمكن تفيد اللي عيونه شقيه واختامها احلى من حليب الأباكير =للصّاحب اللي ضاري بالعطيه الشاعر/ مسلط بن حسن العتيبي |
رد: الشاعر مسلط حسن العتيبي (( عقدة السلك )) (( عقدة السلك ))
عقدتني في حبكم عقدة السلك =عقده ورى عقده تدمر حياتي وأغرقتني في بحر حبك كما الفلك =وقبطانها غرقى يبون النجاتي أرفق بحالي وأسمع اللي بقول لك =عساك تسمعني وتأحذ وصاتي لا إياك يالمملوح تقطع مواصلك =خلك مواصل حبنا ياشفاتي مافيه شخص في الجزيره يماثلك =من الشمال إلى جبال السراتي ومافيه مخلوق بقلبي يعادلك =إلا أنت عندي ياحسين الصفاتي ياكثر ملحك والدلع في تعاملك =وسهم الخطر في عيونك الناعساتي ذبحتني والله مانيب جاهلك =وعقبك عيوني ماتذوق المباتي لكن أبشكي للولي مالك الملك =يرحم حياتي قبل حزة وفاتي الشاعر / مسلط بن حسن العتيبي |
رد: الشاعر مسلط حسن العتيبي (( مديت يمناي )) (( مديت يمناي ))
مديت يمناي للي مايعرفون المواجيب =وحسوفتي يوم للرديان مديت اليميني بمدها للرجال اللي تجاز الطيب بالطيب =أهل الوفاء والمعرفه ماتغيرها السنيني إن قلت ذا طيب قامت تبين به العذاريب =جعل الردي ياجماعه فدوة للطيبيني وإن جيت أبا أظهر علومي من ضميري فرية الجيب =ولاجيت اغط العلوم الخافيه قامت تبيني ممشاي في صحصح قفر خلا يعوي به الذيب =أحسن من مقابل العذال واللي مايبيني الشاعر / مسلط بن حسن العتيبي |
رد: الشاعر مسلط حسن العتيبي (( غازي بن عون )) هذه القصيده قلتها بعد ماسمعت وشاهدت في أحد القنوات الفضائيه شاعر يلقي قصيدة حداثه ليس لها معنى ... وتذكرت قصيد الشاعر العلم / غازي بن عون صاحب القصيد الجزل من العيار الثقيل..... وقلت هذه القصيده : (( غازي بن عون ))
يالله يارحمن ياخالق الكون=يارازق خلقه من أنعام قوته ياناصر موسى على قوم فرعون=ويامخرج ذا النون من بطن حوته سبحان رب(ن) لا أمر كن فيكون=ومن سنته فينا حياته وموته يالشاعر اللي في القنوات مفتون=ياللي مدوخنا بشعره وصوته إن كان ما أنتب مثل غازي بن عون=إترك مجال الشعر وأترك بيوته غازي يصوغ القاف وأبليس ملعون=وجزل المعاني في الشعر ماتفوته ينظم ومعنى الهرج فالبيت مدفون=يصوغها واللي ضعيف(ن) يشوته لاتحسب إن الشعر شيلات ولحون=وإلا كلام كاتبه وسط نوته الشعر معنى جزل والقاف موزون=ماهوب لعب اللي لهى في بلوته وإن كان ماعندك جماهير يوحون=الرجل دايم زينته في سكوته الشاعر/ مسلط بن حسن العتيبي |
رد: الشاعر مسلط حسن العتيبي (( الهديه المشبوهه )) (( الهديه المشبوهه ))
خليتها لله مالي بها شف=أرجي ثوابه وأتقي من عذابه هدية من عقبها القلب يرجف=مشبوهة(ن) واليوم كلن تشابه ورجعتها للي أهداها من الكف=وقمت أعتذر والعذر مابه غرابه أخشى نهار والمخاليق به صف=وكل مع ربه يصفى حسابه لاجوا حفاة ماعليهم ولا خف=عارين يرجون الولي من ثوابه أخاف من نار على جالها أهف=هفة مقيط(ن) والرشا اللي رقابه فيها ملائكة(ن) غلاظ تلهف=وتسقيك زقوم غثيث شرابه ووديان من غسلين تشرب وتغرف=بئس الشراب وبئس منهو هوا به أبطلب اللي بالمخاليق يلطف=يعوضني خير من اللي غدا به ويرجح بي الميزان بالخير لا خف=ويلهمني أميز خطاه و صوابه ويارب جنات بها أشجار وغرف=ماهيب دنيا(ن) كلبوها خرابه يالآدمي يامنتهك حرمته خف=خف الولي اللي شديد عقابه تبطش وتأكل من حرامه وتصرف=وتأمن بمكر الله ولا أنتب تهابه لاجيت في اللي حفرته كنها الجرف=وهلوا على راسك نثيلة ترابه وقعدت ماعندك فراش ولا لحف=وقفى حلالك والأهل والقرابه ثم(ن) ذكرت اللي عنه تغضي الطرف=واليوم في قبر(ن) ظلامه كآبه ماعاد تنفع توبتك لو تعفف=قضي الأمر والموت لحق الصحابه ولا طحت ماعندك من الناس مسعف=إلا عملك اللي منحت إكتسابه إن كان خير فأنت للخير تعرف=وإن كان شر ماتفيد الطبابه ياغافل(ن) قم وأتعظ من هل الكهف=لو شفتهم وليت منهم رهابه مضوا ثلاث ميه وتسع(ن) لهن وف=ماتوا وبعثوا من كهوف الهضابه هذي نصيحة وأنت منتب مكلف=هذا الصحيح ولا تحسبه دعابه الشاعر/ مسلط بن حسن العتيبي |
رد: الشاعر مسلط حسن العتيبي (( المطوع )) (( المطوع ))
والله لو إتشوفها يالمطوع=إنك تحلق الدقن وتطول الثوب وتروح تشري لك شريط منوع=ويمكن تجيب العيد وتصير مطلوب وتزحف مع اللي زاحفين مصوع=وتصير مشهور وفنان موهوب وتروح تمشي في الشوارع تتوع=كنك مريض خالي العقل مسلوب عليه جسم يالمطوع يروع=ياسعد من هو خادم له ومندوب وعيون وردوف عذاب الملوع=ماهوب عن شوف المحبين محجوب والبطن كنه يالمطوع مجوع=لا ذاق لاعيشه ولا ذاق مشروب والصدر تفاح بغصنه مكوع=مافيه لاعيب ولا فيه عذروب وأنصحك خلك يالمطوع مطوع=سبح وهلل وإنتبه تكسب ذنوب الشاعر / مسلط بن حسن العتيبي |
(( العنايه المركزه )) للشاعر / مسلط بن حسن العتيبي هذه القصيده قلتها في أمي العزيزه/ وضحى بنت علي الشنيفي عندما أدخلت العنايه المركزه بمستشفى الأمير سلمان بن عبدالعزيز...... ...... يوم الجمعه الموافق 3/2/1432هـ (( العنايه المركزه ))
جاني خبر مفجع(ن) من ناقلين الخبر=اللي تقول الخطأ واللي تقول الصواب علم لفاني على الجوال عقب الظهر=ليل غشاني ظلامه والقمر فيه غاب من يوم جمعه ثلاثه من بدايه صفر=يوم عبوس حصل لي لخبطه وإضطراب وغدت عزومي ثلاث(ن) عقب ماهي عشر=وإنهار حيلي وجسمي مايشيل الثياب قالوا ترى إمك مريضه وضعها في خطر=وسط العنايه وقفل دونها كل باب وجيت الطبيب المناوب قال لي ماتسر=وإدعوا لها بالشفاء والمغفره والثواب وأنهل دمعي غزير(ن) مثل وبل المطر=اللي ثعوله تدفق من حقوق السحاب أبكي عليها ودمعي فوق خدي حدر=سيلية سيلت في الأوديه والشعاب قالوا لي إصبر وأنا أدري مايفيد الصبر=لكن أبصبر وبدعي بالشفاء للمصاب وأرفع يديني تضرع وأطلب المقتدر=اللي يداوي العلل واللي يفك النشاب إنه يشافي مريض حل فيه الضرر=له مدة ما أهتنا فأكله ولا فالشراب والحمد لله مومن بالقضاء والقدر=والعبد لو طال عمره مرجعه للتراب الشاعر / مسلط بن حسن العتيبي |
رد: الشاعر مسلط حسن العتيبي هذه القصيده مرثيه في والدتي العزيزه/ وضحى بنت علي الشنيفي والتي وافاها الأجل المحتوم فجر يوم الأثنين الموافق 11/3/1432 هـ رحمها الله رحمة واسعه وأدخلها فسيح جناته... (( وأنا لله وأنا أليه راجعون )) (( المرثيه ))
جاني خبرها مفجع يوم الأثنين=يوم(ن) من الأيام ماهوب يومي يوم على أمي ياعرب تذرف العين=وأنهل دمعي لين بارا الكمومي وإنهرت قدام الجموع المعزين=والجسم مايقدر يشيل الهدومي والسد باح وعود العلم علمين=وغاب القمر في خاطري والنجومي وعشري غدت ياناس وحده وثنتين=وزادت همومي ياجماعه همومي أبكي وغيري في فضاء الكون سالين=ولاوقظتهم في المنام الحلومي خيم علي هم(ن) من العام وألحين=هم(ن) كبير كبر ضلع الجثومي على الذي ماجت سوات النساوين=ولا مشت درب الردى والرخومي تمشي على وضح النقى في الميادين=مستورة(ن) متمسكه بالسلومي مصيونة(ن) مالفت إيسار وإيمين=والشين دايم عن دروبه تشومي في الطيب ترجح دايم بالموازين=وتفعل إفعول الطيبين القرومي كريمة(ن) متسلسله من كريمين=من لابة(ن) تلطم كعام الخصومي لكنها طاحت لها عدة سنين=محتسبة(ن) أجر الكريم الرحومي دايم وهي تصبر على الزين والشين=والله يعوضها جنان(ن) تدومي جاها القدر من عقب خمس وثمانين=والموت حق وراضي بالقسومي يوم(ن) مقدر مايفيد المداوين=ومن جاه يومه راح فيه محطومي وعقب العصر صلوا عليها المصلين=في جامع فيه الجماعه زحومي ودفنت بقبر(ن) فوقه اللبن والطين=ياجعل يسقيه الولي بالوسومي والله لولا الله والناس والدين=والخوف من رب شديد نقومي إني لأظلل قبرها بالبساتين=وأذراه دايم عن لهيب السمومي وأفرش ترابه من زلول ملاوين=وألحفه لحف(ن) إجداد نعومي وألبسه بعيار واحد وعشرين=وأزخرفه وأنقشه بالوشومي وأطلاه بالفضه ومعدن بلاتين=وأعطره لو كان كل(ن) يلومي لكن هذي سنته والنبيين=ومن خالف السنه جحود ظلومي ويالله ترحم روحها قولوا آمين=لا جاء نهار فيه كشف العلومي وصلوا عدد من حج بيته ملبين=على محمد عد وبل الغيومي الشاعر / مسلط بن حسن العتيبي |
| الساعة الآن 10:25 AM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd.
-
arab-line : Search Engine Friendly URLs by vBSEO 3.3.0 TranZ By
Almuhajir
... جميع الحقوق محفوظه لمجالس رويضة العرض لكل العرب ...
.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..