الشاعر محمد بن سيف بن نصار السهلي

يالرويضة جعل يسقيك هتـاف المطـر=مردف المـزن والوبـل سيلـه عمهـا
عقب مدة مايشاف الخضار من الزهـر=والزبيـدي مستقـل مثـل روس المهـا
ديرتي مابور فيها ولـو شـان الدهـر=لو يشين الوقـت اسافـر وعـود يمهـا
لـو اروح ايـام ولا سنـة ولا شهـر=لازم اقـبـل نسانيسـهـا واشـمـهـا
اسمع الاخبار منهـا واراسلهـا الخبـر=همهـا همـي وهمـي تـراه يهمـهـا
ديرتي مابين مقطع سمـار مـن حمـر=وصفها بين ومعـروف ابوهـا وامهـا
من عصيل الى الغزيز اهلها بدو وحضر=حدهـا الحفنـة وجلعـوده ومايمـهـا
وحدها التنهات والشعب وجبال الحفـر=واستلمها عقب ابوها المخضـرم عمهـا
ديرت سهول اصيلين في بطـن وظهـر=احتموها في المخاطر وشربـو جمهـا
ماولاها غيرهـم زيـد ولا ابنـه عمـر=لحفوهـا اكمامهـم وألحفتهـم كمـهـا
نحمد الله و نشكره سادها نـور القمـر=وبمر رب البيت حكم السعـودي لمهـا

ياسيف سميـتك على عـودنـا سـيف
أبـي تســـوي بـالـمراجــل ســـواتـه

أبـي الـى جـوك أهل ألأنظى مناكيف
تــقـوم بالـواجــب وتـذكــروصـاتـه

وصاة جـدك ذبحـة الكـبش للضيف
ولـو زودوا فـيه الـثمن قـال هـاتـه

ورزقه على الي طايعته العواصيف
رب الـملـى ألـي معتـني في حياتـه

جاني خبر مفجع وهللت وايقنت = بأمر الاله اللي عليه اتكالي
وصكت علي اعبار صدري ووقفت = امسح ادموع(ن) مثل وبل الخيالي
في ماقفي ما عاد قدمت واخرت = تضايقني العبرات من فقد غالي
يغمى علي احيان واحيان سلمت = امري لمعبودي عزيز الجلالي
عزوني الاقراب وانا تطمنت = قدامهم وانا الله اعلم بحالي
ضاقت علي من كل صوب وتضايقت = ولاعاد لي عن حكمة الله مجالي
وعمي البصر مني ولا عاد فكرت = كني غريق(ن) يضربه كل جالي
وزهمت ابن فيحان اقول انت وين انت = جالي ظروف(ن) طاريات عجالي
يابو مناحي ذرب الايمان لاهنت = لعل يفدونك رخوم العيالي
وعز الله اني يوم عنزت عنزت = على جبل مهوب جال هيالي

نوقاتنى بينعدل في شمايلها = ونبي نعيد البداوه يوم شيبنى
الى ارمزت للحوير يوم نبهلها = ننسى تعبها ولوانها اتعبنى
وانتعب النفس نبي الي يجملها = ومعزت النفس دايم من مكاسبنا
وانساير الوقت والدنيا انحايلها = وهي تحيل علينا لين تغلبنى
تميل دايم علينا الله يعدلها = ونسج فيها وهي تخلف مشاربنى
اذا بغينا التجاره ما نعرف الها = وجمع الدراهم نكرم به شواربنى