رحلة لمطارد الامطار صــــــــــــــ ــور

السلام عليكم ورحمة الله وبركاته

يوم الخميس الموافق 24 / 3 /

كنت ذاهب الى الرياض لموعد مع طبيب الاسنان والموعد صباحي

المهم اني طلعت من عنده على صلاة الظهر واتغدى <<<< لا حظوا

طالع من طبيب الاسنان ويتغدى !!!!!!!!!!!

المهم كنت مخطط وانا في الطريق اني اروح للصمان وكنت مجهز كل شئ معي

ولكني لاني كنت وحداني كنسلت فكرة الصمان قلت يا ولد الثمامة

لا لا ما تصلح طيب اخذ ساعتين نت في مقهى لا لا ما بي الجو جو بر وبس

المهم اخر شئ قررت اني ارجع الرويضة وفعلا فللت البنزين الاخضر واخذت

واحد موكا بـ 8 ريال وحركت وصلت نقطة التفتيش وكان الجو بدأ يضبط

والغيوم تقترب دحدرت مع التزدية ويوم جاني ملف ضرما مرات الدورادمي

فهيت وخت معه !!!!!!!!!!!!!

وين رايح ؟؟؟؟؟؟؟؟؟ مدري

المهم اني دلبحت معه واعجبني كثر الناس والعوائل اللي كاشتين في الطعوس

اللي ممطورة الصباح واللي اعجبني اكثر هو انه كل ما امشي زيادة القى مطر

اكثر حتى وصلت الى ضرما فوجدت امطار لكن من الصباح

وبعدما تعديت ضرما بدا اثار الامطار يزيد كما بدأ الغيم بالزيدة وشفت البرق

في اللحظة هذه كانت الارض كلها مليانه ماء والاودية كلها تمشي

لقيت شباب ياشرون على الخط قلت يا ولد فاضي خلني اساعدهم وقفت عندهم

وين سيارتكم قال قدام عند الشعيب غاطسة في الطين قلت اقدر اوصل لها

قال ايه بس ما راح تطلع قلت يا رجال اذا وصلت لها تسهلت

دلوني على الطريق لين وصلت سيارتهم اللي من نوع فورد صالون والينها

مثل ما قال رايحة فيها ( ذكرتني بالهمر حق السحاميات يا بو سيف )

قلت معكم واير والا سبته اسحبكم قالوا لا ما معنى ( والله اللي ابتلشت بهم )

نزلت السبته وركبتها في موترهم وكان لازم اقرب لين انزل الوادي وحاولت

اسحبهم وبغيت انشب انا ويالله يدفون سيارتي وتطلع ( يا ولد الواحد ينزل على

رجلينه يبنشب خل السيارة عاد ) ومير وتضربنا ذيك السحابة السوداء بالبرد

ويالله نركب سياراتنا وننتظر لين وقف المطر ونعاود الكرة مرة اخرى بس بطريقة

اقوى وهي باستخدام الونش الامامي ولان سيارتهم لازقة في الطين فقد تحمل

الونش اكثر من 5 طن واحتر وبغى يحرق السيارة يعني تحمل اثقل من سيارته

مرتين وتجينا السحابة الثانية اشد سواد من الاولة واتحمس واطب في الطين

وانزل الكريك معي طبعا هم ما معهم شئ واحفر لسيارتهم شوي واطلب منهم

يدفون سيارتهم معي وانا بسحبها بقوة ( خطر جدا على القير التماتيك )

بس وش اسوي المساكين اخر شئ قالوا انت روح اخرناك يمكن عندك شغل

قلت انا خلاص بلشت بكم ماني رايح الا لين اطلعكم والا جلست معكم

المهم دفوا معي وسحبتها بقوة وطلعت بعد جهد كبير مني ومنهم مشيت من عندهم

والارض كلها مو ارض لا بحر ( الوفا ) مساك الله بالخير

ووصلت الى مرات حوالي الساعة الخامسة عصرا وكانت مدينة جميلة

وهادئة ورومانسية ( لاحظوا الصور وتصدقون )

وطلعت منها الى طريق لبخة وحويتة ومنها الى الرويضة

ووصلت بالسلامة بعد المغرب

واسف على الاطالة ( عارف ان فيه ناس بيقولون جاب قصة حياته )

واليكم الصور









مجسم في ضرما عجبني


العليا والسليمانية


بدون تعليق


هنا بدأ الخطر المياه فوق الطريق


المياه على مد النظر


معاينة


حتى هذه المعدات غرقت


واخيرا دل العبارة


معانات الفورد

^


^



^



يتبع

نتااااااااااابع الصور



بداية هطول البرد كان صغير


ارتفاع منسوب المياة احيانا غطى الطريق


مدخل مرات


مجسمات جمالية تزين مدخل مرات للقادم من الرياض


الترحيب على طريقة اهل مرات


هذا الوادي يمشي في النفود

^


^


^


يتبع

المزيد من الصــــــــــــ ـــــــــــــور



الطريق المؤدي الى طريق لبخة وحويته من الاعلا


طخيمان فوق هام السحب


انظر لقوة وكثرة الماء في النفود


هذا الطريق سبق واتيت معه عدة مرات سياحي من الدرجة الاولى


الغروب عند نفود حويته


هكذا بدأ السحاب قبل غروب الشمس




انتهى


ولكم مني احلا وارق تحية

واعتذر على الاطالة

مشاءالله عليك ابونواف

شباب الجميع يقول مشاءلله

تغطيه ومقال عن الرحله وصور جميله

شكرا لك ابو نواف على التغطيه المتميزة

ما شاء الله تبارك الله

عيني عليك باردة