مجالس الرويضة لكل العرب

ما جيت يادنيا بهمي اجاريك
ادفن كيان الحزن في وسط جيبي

ألغي حساب الهم و أجيّر الشيك
وأفتح بنوك العز بسلوم طيبي

و احل صعبات العقود الشرابيك
وأربط شياطين الشقى بالطنيبي

كني الوقار اللي يدلّ المساليك
عمري صغير ومالي الراس شيبي

ياغربتي في بعض الأحيان ناسيك
لا والله الا جرح قلبي عطيبي

يا سِعد قلبي (ياسَعَد ) حين تطريك
أغلى دواوين الشعر يا نديبي

يااغلى قناديل الغلا جيت ناصيك
ياعزوةٍ لا من نخيته يجيبي

اثمن جبال العز تسكن بواديك
تعلى ولا يلحقك شكٍ و ريبي

ديوان شعري لا فتحته يوفّيك
أوقدت فيه العلم واقد لهيبي

اشكي لربي غربتي ثم أشكيك
سكنت دارٍ حمت فيها غريبي

شوقي شمالي يم دارك وانا اخيك
للدار وحشة والبعد من نصيبي

جيت المراقيب النوايف أناديك
رد الصدى ذيبٍ يخاشر قنيبي

قال الندا : ما ياصلك صوت راعيك
رديت أصوّت لين بحّيت ذيبي

تشوقني جمعة وفا والوفا فيك
وافقد فناجيل الغلا بالمغيبي

لا هضت كني في عروش المماليك
أسيّل القيفان واسقي شعيبي

أسخى قصيدي بالدلال المحابيك
لا جاك فنجالي يقنّدك طيبي

بلّّغ سلامي والقصايد توصّيك
في كل من يسكن حنايا قليبي

ياجعل ربي بالنعم دوم يجزيك
سبحان ربٍّ عالم بكل غيبي

عبدالله البراهيم