مجالس الرويضة لكل العرب

البارحه كني من النوم ملزوم
والنوم أشوفه بس عيا يجيني
قلت وش فيك قال انت محروم
حالك حزينه وانت شكلك حزيني
اشوف في خدك علامات ووسوم
ترى دموع الحزن خلتك شيني
قلت المحبه صابت القلب بسهوم
ومن كثر تفكيري صنعت الونيني
ابحرت في مركب من الحزن مثلوم
وعلى محيطات الهوا سابحيني
وهبت على المركب معاصير وغيوم
وضاعت مجاديفي وتعبت ايديني
واصبحت مثل اللي يتيم ومضيوم
ماله عوين وحالته بالمهيني
والموج زاد وقلت ياموت معزوم
والموت قبل اني عزمته يبيني
قمت اتشهد كني اليوم معدوم
وش حالة المعدوم ياعارفيني
والمشكله ماني بسباح واعوم
حوت البحر يبغى الغداء يحتريني
ياحوت جاك الرزق ياحوت مقسوم
تكفى طلبتك روح خلك عويني
ما ابي عواذيلي يقولون مرحوم
اللي كلاه الحوت ذيك السنيني
ياحوت ابغى فزعتك جاك مكلوم
جرحه جديد وجاب جرح دفيني
ابيك توديني على شاطي القوم
والا ترى ليلي معك ليلتيني
من بعد ذا ياعاذلي اكثرو اللوم
انا طحت بالحب والحب فيني
حب المهاة اللي بها الزين مرسوم
فازت على الزينات عرب ورطيني
من حبها انا ماذقت لذة النوم
والعمر رااااااااااح والحب يكتويني
ترسل مراسيل الهوى دايم الدوم
وانا بعد مرسل لها نون عيني
حبي لها يزداد يوم عن يوم
والحب لامن زاد له جمرتيني
جمره بكبد اللي له البعد محتوم
وجمره خطيره تحرق الساكنيني
يامن يودي لي من البعد مختوم
حطيت فيه الشعر ياسامعيني
وصلاة ربي عد ماطاير يحوم
على الشفيع وصاحب القبلتيني