|
مجموعة قصائد ل احمد الناصر قصيدة لوعة المغرم أعالج لوعة المغرم وتكبر لهفة المشتاق بحسن رضايا أسوق خطايا أقدم رجلي وأفهقها وأهوجس من طلوع الشمس لمغيبية الاشفاق وابلوي رجلي في ظلام الليل مدري وش يوافقها أبصبر وأتصبر ما أظن إن الصبر ما ينطاق لقيت الصبر مر ولو يلوش الكبد يحرقها الا يا كاملين المعرفة سلك الغرام دقاق إذا صاب القلوب الله يعافينا يخرقها أنا لي صاحبن خده ورا الشيله كما البراق به عرض المزنه اللي مثله شمس الظهر بارقها خلقه الله وزين خلقه وأخلاقه الخلاق جليلن جنسها في زينها سبحان خالقها لها عينن ليا لدت بها تذبح بها العشاق وبها وصفن من عين المهاة وطول عاتقها إلا ما شفتها ضاقت بي الدنيا وصدري ضاق وأنا لولا الهواليك كان عيني ما تفارقها أحب مشاهد الغالي عسى ماهو بحب فراق ولو راحت بعهدي ما أغلي بالدنيا ومشرقها إلا جا الليل ما شفته يزيد بقلبي الدقاق معه روحي بسلك العنكبوت الله معلقها ليا عرض عليا أقف مثل وقفة كسير الساق وساعة الوداع أسرع من الكدلك دقايقها أنا وياه جددنا القسم والعهد والميثاق ولكن قدرة الله سابقه محدن يسابقها تعاطينا العهد في واحدن من عاهده ما باق مادام الناس ذاهبه فالنفس يذهبن لواسقها كل من عاش كل من عاش بالدنيا يشوف العجايب مثل ماشفت بالدنيا وشفته باهلها قمت ابرق وافرق بين مخطي وصايب مثل فرق الجبال النايفه من سهلها والتوافيق عندالله حظوظ و وهايب عند رب يجازي كل نفس بعملها اشهد ان الهدوم يسترن المعايب اثرها تستر الحرمه وتستر فحلها الاوادم بعضهم مثل وصف الجلايب لو توحد بها ذيب الخلا كان اكلها كم صبي تحسب انه ع الضرايب وان بخصته , كرهت الديره اللي نزلها مايسر ان حضر , وان غاب ماقيل غايب مار الارزاق عند رب لخلقه كفلها مايضد الضديد ولايفيد القرايب يوم نفسه تعدى حدها من زعلها وفيه رجل يحل المشكله والنشايب كل ماحملوه الواجبات احتملها واقف للزوم ومرتكي للنوايب والحمول الثقيله مالها الا جملها ليت روحه قبل تركز عليه النصايب حط عنه اربعين من الزلايب بدلها وفيه منهو مسالم مايحب الطلايب مشتقى من رضى نفسه ولا من زعلها وفيه منهو اذا كبرت عليك المصايب ساق وجهه وجاهه لك ونفسه بذلها وفيه منهو يبا الجودا فلاشك هايب كل ماناض صدره جى عضوده خللها وفيه منهو يحل المعجزات الصعايب اصغر افعاله الجزلات محدن فعلها وفيه منهو يعيش وعيشته بالسبايب كل ماسمعله غلطة من رفيقه نقلها وفيه منهو على نفسه رضى بالغلايب الله اللي رفع نفس ونفس خذلها لو تبي تنصحه لله نجر الهبايب انكرك والنصيحه ردها ماقبلها اشهد انه عقوبه من كبار العقايب قاصر المعرفه قلبه كما قلب بلها قصيدة آه من قلب هواجيسه تلوفه آه من قلب هواجيسه تلوفه مع همومه كل ما اقفن واقبلني لاذكرت اللي زها الحنا كفوفه يالطيف الحال طار النوم عني ليت عيني وان بغت شوفه تشوفه كود قلبي يستريح ويرجهني حيث عيني عن هوى غيره عيوفه ماتبي غيره لو انه غاب عني والله اني طحت في حال المروفه حيلتي كثر التوجد والتمني ماذبحني كود من تذبح وصوفه من جميع البيض حبه ممتحني عنز ريم مابعد رامت اخشوفه قايده للصيد ترعى كل ني والجوازي كنها معها معسوفه يوم تجفل كلبوهن يجفلني هرجت العشاق يازين معروفه والغلا باقصى الضماير مستكني الهوى مثل المغازي والنكوفه والقصيدة من سمع فيها يغني القمر يظلم الى بين كسوفه لاتبين للعرب ظنك وظني لازم راعي الهوى تكثر صدوفه لو يطولن الليال او يقصرني والمعافى ملحق الدنيا حسوفه ماطعنه اللي من الفرقا طعني لو تروح الروح للزين مخلوفه والعذارى يبعد او يقربني |
رد: مجموعة قصائد ل احمد الناصر قصيدة راعي المحبة يا ناس راعي المحبة لا تعذلونة مهوب عن صاحبة دالة ولا سالي لو يسهر الليل كلة لا تلومونة الحب بلوى مانيب اول ولا تالي لى صاحب ما قطعت الياس من دونة لو غاب عني خيالة دوم يبرالي الصاحب اللي سحر هاروت بعيونة ودي بشوقة ولكن ما تهيا لي يا هيف الخصر عيني فيك مفتونة والبعد ياصاحبي ما يرخص الغالي الروح يا صاحبي بحماك مرهونة عزي لحالي عقب فرقى هوى بالي ياكود وصلك على مثلي ويا هونه ان كان حالك طواها اللي طوى حالي عن غيرك القلب غسلتة بصابونة والعين ما تلتفت فى كل الازوال ما يجرح القلب كود فراق مضنونة ابطيت ما ارسلت لي يازين مرسال أجر صوت جميع الناس يوحونة غديت مثل المصيح بالخلا الخالي قصيدة الراي رايه وأرجلي اللي تبين ضلعها من غير ساموح حار القدم يا الله الخيره ولا فيها اروايه باسباب زول نطحني بالطريق وشاحني شوح اودعني أمشي وألد اخلاف واقصر في خطايه زول نطحني وخذ عقلي ولا لي منه مصلوح خلاني أركض واغني من خلايه في خلايه اللي خذا القلب أظنه مخطرن يلحق على الروح الموجب إنه مريض خاطري حد النهاية هذا وأنا عن طريق المنتحي منهي ومنصوح مار المقادير جابتني على حسنا أو سايه مادام باب الهوى لأهل الهوى بين ومفتوح أبين من الشمس عقب الظهر في وجه المرايه يامن يودي سلامي والهوى راعيه مفضوح ويخبره بالمصيبة كلها والراي رايه ان كان لد النظر يمي عن اللي فات مسموح وان كان قفا وخلاني فانا سبة عناية واعين ياللي من الفرقا بكت.. والقلب مجروح مانيب عازي لعل الله يجبر عزايه الصاحب اللي ليا شفته عجزت اقعد ولا أروح ما هو طويل نشاش ولا قصير الجرم غايه يا من سميه على اسمي الناس به زودن وبه نوح ثلاثة أشهر ينزل نصف ثالثهن كفايه واثنين يكمل بهن اسمه أوله حراس وشبوح كم لي وأنا أرجيه جعل الله ما يقطع رجايه |
رد: مجموعة قصائد ل احمد الناصر قصيدة انا المطلوب والطلاب الا ياونتاه اللي من الفرقا برت حالي كما برى الدبى الغصن الوريق اللي على حله على اللي من ثلاث سنين هو همي وغربالي ولكن ماحصل لي منه ساعة تبرى العله إلى مني بغيته في محله ما تهيا لي ولا منه بغى ياصل محلي صار به ذله أنا وياه مثل اللي ورد مطوية الجالي طوى حاله ظماه ويوصف الماء له ولا دله إلى منه نطحني قال يا ستار الأحوالي عجب لله كيف الخل مايشفق على خله؟ وأنا أركض طول ليلي مع نهاري في الخلا الخالي أصايد رغبته واتبع طريقه واتبين له إلين أصبحت أنا المطلوب بالأول وبالتالي أنا المطلوب والطلاب راع القذله الهله إلى مني بغيت أنساه وادله عن هوى بالي بلاي النفس ماهي من صخيف الروح منحله كذوب اللي يقول أقوى فراق الصاحب الغالي متى ماغاب عنك اللي توده بانت الخله إلى مني قطعت حبال وصله قام يبرالي لحظني بالعيون اللي بها سيف الهوى سله يطيح اللي بكفي وأذهل الدنيا وهو سالي واعود في عماي الاول اللي مايسكن له متى ماغاب عني ماتبي حالي ولا فالي والا شفته بعيني كن حكم الروس لي كله ولاني قاعد ارجي متى يرمي به الفالي وانا ما ودي العدوان تدري به وتفطن له قصيدة في يوم سبعة عشر في يوم سبعة عشر بتالي رجب ياليتني ما دخلت السوق وانا اجنبي العصر مريت يوم السبت سوق الذهب لقيت مخلوق لا هندي ولا مغربي من شوفته ما لقيت الا السهر والتعب صار السهر والتعب من شوفته مكسبي اللبس لبس اجنبي والدم دم العرب زولن ليا شافه الشايب يعود صبي ! مكملن بالجمال وبالحسب والنسب قلت السلام وتبسم قال لي وش تبي وليا تقربت من زين الحلايا هرب واقول عطني الصراحة وانت ابو ما تبي بغيت اعرفه وش اسمه مير ما الله كتب يقول ابي سمعتي واخشى على مذهبي تبين النور من خده علي واحتجب يا الله عليك الخلف تخلف على اتعبي انا قتيل العيون النجل سود الهدب ذقت العنى والعذاب ولا حصل مطلبي قلت ارحم اللي طواه الهم وانت السبب قالت لعله يطاولك السهر بسببي قلت الظليمة حرام بكل حشمة وادب قالت معي عين وصانا عليها النبي انشد ولا يلحق النشاد لوم وعتب انا غريب وقضى مايي وقضى منهبي انتي من اهل الكرك والدير ولا حلب قالت يشيب الولد ما حصل اللي يبي قلت انتي من السويد اهل الفرح والطرب قالت بلاد العروبة رغبتي وطلبي انتي من اهل الخليج مخصلين النشب قالت من المسلمين وجد ابوي عربي واللي يقول الهوى كله خطر ما كذب قلت اوعديني وعد بس اذكره واكذبي قامت تعجب وقالت يا زمان العجب يا لايمه للغرام انا اشهد انك غبي عليك رسم البدواة والزمان انقلب قالت عظامي ودمي واللحم وعصبي انا من البدو كان الدم وصل الركب يوم السلاح المفتل والرصاص حلبي |
رد: مجموعة قصائد ل احمد الناصر قصيدة قلبي يهذري به يابدر قبل الليل قرب لي الفرت شيك على البنزين والزيت كله القير والدفرنس وإن كان ناظرت به نقص راعي المشحمه مافطن له عاير هواه وماه ولا تذكرت شي يبيه اللي يبي فدوة له حتى اللي مني على خير سافرت أمشي ونفسي راضيه مسفهله عن اللزوم اللي ضروري تأخرت هات الخفيف وماتثاقلت خله وإلي ظهرت من البلاد وتشطرت ترى لزومي فيه جا وقت حله إلى أنتحى قمت أذكر الله وكبرت كنه يسابق تالي العصر ظله لآمر عجلات المواتر وفكرت لاكنهن وقاف مثل الإخله طار علي إلى مشيت وتنحرت قصر يسر اللي يجي عاني له مارحت عنه يمين ولا تياسرت قلبي يعذريبه وعيني تدله ترى الدروب السود مهما تصاغرت منها تراها عله فوق عله وإلا الدروب البيض مهما تكابرت ترى الحظيظ اللي تجي سكة له إلى بغيت أفرج الهم سيرت للي حجاجه للمسير يفله اللي ليا إني جيت عنده تحيرت فلة حجاج ومجلسه ماتمله عز الله إني للصداقه تخيرت اللي رفيقه مايشوف المذله عبدالعزيز أكبر من اللي تصورت الفعل فعل سعود والدل دله بغيت أحبه ربع فعله وقصرت بأول شبابه والفخر مقبل له ياكم أماريبه وياكم فاخرت ياسعد عين اللي يجي فزعة له مالي عذر عن جيتك لو تعتذرت ياللي تنزل كل رجل بمحله عن طبع أبوك وعادته ماتغيرت للي سنام المجد له مستحله وردتها هداج تيما وصدرت من سار مع درب فهو جايز له قصيدة اه وجرحي اه وجرحي اللي حار فيه الطبيب قرب الموت مني يالله المستعان ياهل العرف والمعروف جرحي عطيب خبرو بي صخيف الروح جال الثمان كود جرحي إلى شفته بعيني يطيب بين موت وحياه وبين خوف وامان يالله اني دخيلك من رداة النصيب لو يلين الحديد الترف مابه ليان كيف شيبت بي من قبل وقت المشيب وانت غربال حالي بالخفاء والبيان نوب عني بعيد ونوب عندي قريب والله اني لا اقول اسباب مابي فلان خف من الله تري الله فوق خلقه رقيب وانت غربال حالي بالخفاء والبيان قبل قرف تحط الناس سرح او عزيب انتحي في مكان وانتحي في مكان |
رد: مجموعة قصائد ل احمد الناصر قصيدة الفلك يستدير بالله يا للي تبا الفيحا عنيزة ديرة أهل الفخر يا سعد منهم عضوده بالشدايد والزمان العسير نطاحة الكايده لا قل بالدنيا بعير الظهر الطيب منهم وفيهم كلهم كبيرهم والصغير جعل السلامة زهابك بالطريق الى نويت السفر اسلم وسلم على عيال العميم صغيرهم والكبير اهل الوفا والمروه والشهامه لويشين الدهر من يديك ليدين صالح خذ كتابي جعل خيرك كثير يا بو محمد ليالينا تصافق مثل موج البحر عجزت أميز لها وجه او قفا يا الله مقسوم خير واحترت مدري وش اخذ وش اخلي بين هم وقهر المبتدا زين مير المقبلات الله علم وش يصير اللي ذبحني بغير اسلاح ما جا منه علم او خبر اللي بعقلي وروحي في حياتي صايرن لي خشير متى على الله عيوني من صخيف الروح تملا النظر القلب لولا الضلوع اللي يردنه خطير يطير كن الشهر لي سنه عقب التفرق والدقيقة شهر يا الله تلطف بحال المغرم العاشق عليل الضمير يا صدق راع المثل قال الهوى والحب كله خطر والزين مثل الحيا متبوع مشهاة الغني والفقير اتلا الخبر يوم وادعني واقدماه طريق الحفر للديرة اللي ورى الرقعي يقود القلب سلك الحرير اصعب علي شوفته من شوفة اللي فوق سطح القمر لا شك ابصبرا على ما صابني لين الفلك يستدير قصيدة أذن المذن أذن المذن ونادى طول صوته بالمناره وقمت طولي للسفينة ثم فليت الشراعي لو يزيد الموج ماني فالبحر سواق طاره عارف مجرى السفينة في نزول ورتفاعي كل رجال هواجيسه على قد اقتداره والحظيظ اللي مع العربان عاقل واجتماعي العرب لو بشروني كان سلمت البشاره في بيوت مخترعها طيب العرف اختراعي بين الأثنين المفاهم في محله والمشاره لو يجون اخوان صلب أو هم خوان من الرضاعي حجة الغايب معه ومن اعتذر قبل اعتذاره مايضيقن النفوس ولا الدروب اللي وساعي وانت عندك لاتعلم بالثمانين الحراره والهروج الضايعة مثل الهمل من غير راعي صابر بالحق دام الحق من جار لجاره لو نجيبه دين ياصالح من البنك الزراعي والسعادة حظ والا العرف والمعنى شطاره لو رضاك بعيد اسافر له على النقل الجماعي وسع الخاطر ولابه كسر يحتاج الجباره دايم العاقل وسيع ابطان ماهوب اند فاعي اعتذرت من الرفيق وزبدة الهرج اختصاره إن عذرني كثر خيره وإن ومر بأمره مطاعي قصة جت من رفيقك غصب من غير اختياره سألفه ومخالفه ماودنا الهين يذاعي |
رد: مجموعة قصائد ل احمد الناصر قصيدة ذوقتني الحرمان أول وأنا ماشري بحبك ولا أبيع واليوم بأول سوم والله لابيعه عقب أنتشالك لي بروس الأصابيع رميتني بين الرجا والقطيعه ذوقتني الحرمان سبعة أسابيع وأشقيت نفس لك مطيعه مريعه أيام صفو الحب تآمر وأنا أطيع واليوم لامرك والله إني ماطيعه لاتحسب إني عقب فرقاك أبا أضيع البيض واجد وارض ربي وسيعه سبعت قلبي من محبتك تسبيع وأقفيت عنك وسو ماتستطيعه خذ راحتك يامصنع الحب تصنيع مادام نقض العهد عندك طبيعه من لا على صهوة جواده مصاريع خطر يطيح ومثل هذي هزيعه مزعت صورة ماضي الحب تمزيع وأنوي على تكوين صوره فضيعه مع من جبينه مثل نور الشعاشيع وإلا كما برق تزايد لميعه الصاحب اللي لامري امطيع وامريع من شان حبي كل غالي يبيعه قصيدة سلام يالوادي سلام يالوادي اللي قد نزلك العام مخلوق مدري من اي النحايا راح من ديره الديره لكن الى جيت مدهاله وقفت وصابني عوق يحتار عنده قدم رجلي وياقف عن مسيره ماهوب ودي ولكن حب خلي ساقني سوق اناظر البيت من عقبه واسولف مع قصيره من كثر ما أقبل معه واقفي معه سويت طاروق هذي سواة العشير اللي شكا فرقا عشيره ياشين فرقى الضحى شيناه والمطرود ملحوق الله يظفي على اللي راح جنحان الستيره وشلون ابدله وقلبي مع صخيف الروح ماسوق لوى هني المعافى ماشتكى شره وخيره وانا تطارد هواجيسي وحمل الغبن مطبوق اجحد صوابي عن العالم وانا روحي خطيره قالوا لي الناس خل المنتحي والحي مرزوق والناس واجد ولكن ماتريد النفس غيره هذا وانا خابر راعي الهوى ماهوب ماثوق والله فلا انسى العشير اللي علي يبدي السريره يقوله اللي يبي خله وله بالدرب خازوق ماله جدى إلا تكسر عبرته بأقصى ضميره |
رد: مجموعة قصائد ل احمد الناصر قصيدة ود الخبر للغضي وده ود الخبر للغضي وده ود الخبر لاشقر الراسي ابو ثليل الى كده اشقر على المتن له كاسي يازين صبري وصل حده مانيب للي مضى ناسي ماقدر على البعد والصده ليل ونهار انت هوجاسي عندي وكنك ورا جده تقطعت عنك الارماسي اللي سواة القمر خده من شوفته مانقطع ياسي والله لو طالت المده ماقطع رجا ظبي الاطعاسي لاصبر ولو طالت الشده لو صابني منه وسواسي قصيدة البارحه يوم العباد رقود البارحه يوم العباد رقود النوم مايطري على بالي مجروح روح وخاطري ملهود ياناس خلوني على فالي تبكي عيوني والدموع شهود أي والله أبكي صاحب غالي يازين مالك بالعذاب فود أرفق بحالي يا بعد حالي ودي بوصلك يا نعيم العود ودي ولكن ما تهيا لي اللي ذبحني بالعيون السود من قبل اعرفة خاطري سالي ترى المحبة ما بها منقود والله فلا اسمع هرج عذالي ياعود ريحان عليه ورود ومنين ما هب الهوى مال هبي بريحه ياهبوب النود يطفي بعض همي وغربالي الحب يذبح والشقا محدود ماهى سواليف على الخالى يا منوتي يا غاية المقصود زولك يورى لى ويبرا لي |
رد: مجموعة قصائد ل احمد الناصر قصيدة سهرت البارحة سهرت البارحة واشغلت بالي ××××× على الله اعتمادي واتكالي أهوجس والهواجيس أتعبتني ××××× وأعد اللي جرى ليه أو مني هواجيس تفيد الناس عني ××××× أبين للبعيد أو للموالي ولا به راحه إلا بعد شده ××××× ولا أحد يفتخر في ورث iiجده ترى كل له أمن العرف قده××××× وأنا مثل العرب من قد حالي خلقت بديرت من ذاق ماه ××××× لو أنه غاب عنها ما نساها حشى والله ما نلحق جزاها ××××× بها جيرانها مثل الأهالي وهي دار الحميه والمعزه ×××× وهي دار الوفاء في كل حزه لها من شرق ضلع طويق بين ××××× وعنها من جنوب القاع لين هو الزلفي لعل السيل فاله ××××× إلى منه نشا وامطر خياله تزين أيام راعيه أو لياليه ××××× سقاك السيل يازين المفالي بلاد الخير ياهاك البلادي ××××× تعيش الحضر فيها والبوادي والى جاهم بعيد الدار عاني ××××× يبا الفزعه وحاديه الزماني عطاياهم العانيهم جزيله ××××× ولا قد مدوا المده قليله ولا بايمانهم يمنا بخيله ××××× ولا يعطي الجزال الا الجزالي |
رد: مجموعة قصائد ل احمد الناصر الله الله الله عليك اذا روقّت... كل قصيدة ازين من الاخرى... يعطيك الف عافية والله لايهينك... |
رد: مجموعة قصائد ل احمد الناصر قصيدة الله اكبر ياحمام الله اكبر ياحمام من صلاة العصر ناح وانشغل قلبي معاه لاجزاه الله بخير الله اكبر يوم ناض طار ورفرف بالجناح ودي اتبع ساقة الراعبي وازريت اطير ودي اتبع ساقته بالمقيل وبالمراح شوف عيني بين هاك المباني يستدير واهنيك بالمسا ياحمام وبالصباح كل يوم تشاهد الترف ملهوف الضمير ياحمام الورق قل للغضي سيد الملاح عن ذهابي قل لزين الوصايف يستخير وصف خده بارق الوسم من منشاه لاح يوم شعشع زاد نور البلد عقب الاخير والعيون عيون خشف(ن)تربى بالبياح كل ما هبت نسيم الهبايب يستذير يامريح القلب قلب المولع ما اتستراح تقل يجذب للهوى في سلوك من حرير اتضيم واتهضم وانا مالي صلاح واتقلب طول ليلي مثل وصف الكسير ياهلي لولا الهوى كان اطنب بالصياح عقب فرقا الترف مادري وش الدنيا تصير كن بعيونه لراع الهوى زرق الرماح هو خطر واللي تولع معه قلبه خطير هذه القصيدة قالها الشاعر الكبير أحمد الناصر الشايع في رثاء ابنه محمد رحمه الله الذي توفي قبل شهر أو أكثر بحادث مروري فقال هذه القصيدة الباكية يا بعد نوم الليل عن حجر عيني صبر على ما صار من وال الأقدار صبرت صبر باح منه الكنيني أضحك مع العالم وكني على نار ما غير أهوجس بين نفسي وبيني يعلم بها العلام في كل الأسرار تقل اتحرى لي علوم تجيني مع الطروش اللي يجيبون الأخبار فهمت رأس العلم من كلمتيني من يوم قالوا جا محمد ونصار تكسرت عقبه جرايد يميني عز الله اني عقب ما صار صبار من عقبها ونيت لي ونتيني ونة غريب بالخلا ضاع واحتار لولا الله أبرك ثم قوة يقيني لا طير مثل الطير من كف صقار تخنقني العبره وأفرك يديني واحترت مثل مصالي النار والغار علم يخلي كل قاسي يليني كنه على قلبي رصاص أم كرار الى ذكرت عياله المصغريني هذا يعزيهم وهذاك زوار احد على جنبه واحد له ونيني جتني هموم القلب من كل الأقطار قلت اصبروا والله مع الصابريني الله يكافيكم صواديف الأشرار عسى عوضنا الحي بالميتيني ناصر ونايف ذخرا سر واجهار وأحمد وعبدالله ذرانا الحصيني صغار سن وان بدا اللازم كبار يجبر عزاي اللي بخلقه ضميني محيي العروق الميته عقب الأمطار مالي عن المكتوب فوق الجبيني لو رحت شرق وغرب ويمين ويسار صليت نصف الليل لي ركعتيني أطلب له اللي للخطيات غفار خفف ذنوبه يا أرحم الراحميني في ماقف ما ينفعن فيه الأعذار جعله برضوانك من الفايزيني بالماقف اللي به يضيعن الافكار في ماقف به كل خافي يبيني تمت وصلى الله على سيد الأبرار |
رد: مجموعة قصائد ل احمد الناصر قصيدة ألا يا ونتاه اللي من الفرقى ألا يا ونتاه اللي من الفرقى برت حالي كما بري الدبا الغصن الوريق اللي على حله على اللي من ثلاث إسنين هو همي وغربالي ولكن ماحصل لي منه ساعه تبري العله إلى مني بغيته في محله ما تهيا لي والى منه بغى ياصل محلي صار به ذله وإلى مني بغيت انساه وادله عن هوى بالي بلاي النفس ماهي عن صخيف الروح منحله والى منه نطحني قال ياستار الاحوالي عجب لله كيف الخل ما يشفق على خله ؟! يطيح اللي بكفي واذهل الدنيا وهو سالي والى منك نظرت اللي توده بان بك خله واناللي طول ليلي مع نهاري بالخلا الخالي أصايد رغبته واتبع طريقه وآتبين له الى من غاب عني ماتبي حالي ولا فالي أعود في عماي الاول اللي مابه إشكله انا وياه مثل اللي ورد مطوية الجالي برى حاله ظماه ويوصف الما له ولا دله كذوب اللي يقول اقوى فراق الصاحب الغالي وانا لامن نظرته تقل حكم الروس لي كله إلين اصبحت انا المطلوب بالأول وبالتالي انا المطلوب والطلاب راع القذلة الهله ولاني قاعد أرجيه لين إيجيبه الفالي وانا ما ودي العذال والعدوان تفطن له قصيدة بأسباب زول نطحني وارجلي اللي تبين ضلعها من غير ساموح حار القدم يالله الخيره ولافيها اروايه بأسباب زول نطحني بالطريق وشاحني شوح اودعني امشي والد خلاف واقصر في خطايه زول نطحني وأخذ عقلي ولالي منه مصلوح خلاني اركض واغني من خلايه في خلايه اللي خذا القلب اظنه مخطر يلحق على الروح الموجب انه مريض خاطري حد النهايه هذا وانا عن طريق المنتحي منهي ومنصوح مير المقادير جابتني على حسنى وعلى سايه مادام باب الهوى لأهل الهوى بين ومفتوح ابين من الشمس عقب الظهر في وجه المرايه يامن يودي سلامي والهوى راعيه مفضوح ويخبره بالمصيبه كلها والراي رايه إن كان لد النظر يمي عن اللي فات مسموح وإن كان قفى وخلاني فانا سبة عنايه واعين ياللي من الفرقا بكت والقلب مجروح مانيب عازي لعل الله يجبر عزايه الصاحب اللي ليا شفته عجزت اقعد ولا اروح ماهو طويل نشاش ولا قصير الجرم غايه يامن سميه على اسمي الناس به زود وبه نوح ثلاثة اشهر ينزل نصف ثالثهن كفايه واثنين يكمل بهن اسمه اوله حراس وشبوح كم لي وانا ارجيه جعل الله مايقطع رجايه |
رد: مجموعة قصائد ل احمد الناصر قصيدة يامل عين الى جا الليل يامل عين الى جا الليل عيت لاتنام تكثر عليها الروابع يامعين الصابرين من عقب ما استبشرت بالنور وانجال الظلام شافت من الغيظ مايملي نظرها مرتين لا وهني المعافى مايلوم ولا يلام مستانس لو يزين الوقت ولا مايزين ماذاق مر الفراق وفارقه حلو الغرام والولف ملاك ما يحتاج عراف وظمين الصاحب اللي هدب عينه مثل ريش النعام ما يلتفت مع طريقه من يسار ومن يمين اكبر مصيبه ليا سلمت ما رد السلام مدري وش اللي خطر في بال وضاح الجبين إن كان لك يا اشقر المجدول في هجري مرام صبرت صبر الجمل بارضاك لو ضلعي متين الموجب انه ملكني حب مردوع الوشام لا خير في عشرتن ما هيب في حرزن مكين هو حق ياللي تعرفون الحلال امن الحرام يسهر عيوني ويدعي سري الخافي يبين العشرة الصافية تقود أهلها بالخزام ما تختلف عشرة الغالي على طول السنين وان كان عقب البطا فك اللحام من اللحام ما عاش أبو نية وحدة مع أو نيتين ياصاحبي ما تساون الغوارب والسنام من خف ميزان قدره لو قلبه ذهين لو شفت منك الجفا مارضى على عيني تضام قطعت منك الرجا كنك مع الميتين قصيدة حمام ناح الا يالله بنو الخير لاتجزا حمام ناح يزيد الهم بأصواته وروحاته وجياته يذكرني زمان قد مضى كله طرب وأفراح زمان العام والا اليوم لاوده ولاهاته والا والمزتي للي جزت عينه وسده باح ولايبغى العرب يدورون باسراره وغاياته ولا تقضي هواجيسه ولا يقعد ولا يرتاح تغير واشتغل فكره وهي ماهيب عاداته على اللي تل فلبي من عروقه في يديه وراح طلع درب مثل طلعة كرى صعبة ملفاته توافقنا على بير طويل مثل بير رماح وانا فيه اتفرج لين غلق كل حاجاته وانا عودت يم البير مثل اللي يويق وطاح تكسر به ثمان ضلوع وذراعه ترقاته وربعه مالقوا حبل طويل ولابهم سباح وهو في قاعة البير الطويل يجر ناته لبو عين مثل عين الوحش تذبح بغير سلاح وخد وجيدفيها منوة العاشق ومشهاته اهوجس فالنهار وفي ظلام الليل أصيح صياح ولا ينلام من ذاق الغرام وذاق لذاته فلا شك البلا من دونها كسابة الأمداح قضبها في يدينه واحد قضب العمى لشاته وغلق دونها باب الحديد وكسر المفتاح وانا مقهور من جور الزمان وحر لوعاته جرحني صاحبي جرح عجز بعلاجه الجراح حسانيه القديمة ماتكافي ربع سياته هاك الحين والاوادم ماتشكك والقلوب اصحاح وتال الوقت كل شانت ظنونه ونياته |
رد: مجموعة قصائد ل احمد الناصر قصيدة ابتدي باللي ابتدي باللي عليه اعتمادي عالم بالبينه والخفيه كل شي مرجعه النفادي غير والي العرش ورب البريه دارنا الزلفي لياجا الوكادي مربع الأجناب والآهليه دارنا اللي يوم وقت الطرادي دونها نارد احياض المنيه كم طردنا من عدو معادي ما يجبيها دام الروح حيه جعل وبل السيل مع كل وادي من حقوق المزنه العقربيه يسقي الزلفي نفود او حمادي والجبل يمشي شعيب وشغيه فعل اهلها عند حضر وبوادي يشهد الرجلي وراعي المطيه ربعي لو ينادي المنادي يظهرون اهل الوفا والحميه ما حد منهم وقف بالحيادي من ذكرهم فزعته واهنيه قصيدة نصحة قلبي عن هواه نصحة قلبي عن هواه وعذلته لاشك عيا لايطيع النصيحة البارق اللي ينعش الروح خلته انا المشقى والعرب مستريحة عساه يسقي وادي قد نزلته يوم من الأيام يازين ريحة واد الغرام اللي يذكر دخلتته فيه العذاب وبه رسوم مليحة ماقال ابن لعبون في مي قلته قلت البيوت الصايبات الصحيحة بذلت مجهودي وجهدي بذلته والله ماقول إلا العلوم الصريحة زول قتلني بالهوى ماقتلته لو مت باسبابه عسى الله يبيحة ياكبر هم عقب فرقاه شلته مار الليالي بالمواصل شحيحة لو قلتو ابشر بالعوض ماقبلته جوزوا وكثرالعذل يرث فضيحة ياللي عذلتوني وش اللي عملته يالايم العاشق تطيح بمطيحة الباب عن كل العواذل قفلته ياناوي بالعذل طبه بطيحة لو لي حلال مع حلالك عزلته كم ضحكة جا عقبها كم صيحة |
رد: مجموعة قصائد ل احمد الناصر قصيدة رثاء للشاعر الكبير / أحمد الناصر الشايع نهار ثالث عقب عيد رمضاني ناس عطاها الله وناس محرومه أحدا قضى عيده سلام وتهاني وأحدا توصله الكواكب همومه صادفت صدفه من صدوف الزماني منها قوي الحيل تفتر عزومه هذا زمان الهم والإمتحاني وقت على قلبي تعاقب سهومه الاوله كامل جميع المعاني مزبن المضيون شرع الخصومه محمد اللي فالقسى واللياني عقبه سمايه غايبات نجومه والثانيه باقرب قريب وداني خامس عيالي يوم جتني علومه قالوا مابين الخاصره وحلباني ولدك مات اللي ترجى قدومه جاء يومه الموعود باربع ثواني قلت السبب قالوا دنا منه يومه علم على الكبد الصخيفه كواني كية عطب ما تنشكى للحكومه تهشمت كل الضلوع المحاني مفجوع والمفجوع ماحدا يلومه أخذت لي ساعه وأنا في مكاني حسبت لي عشرين طيحة وقومه أليا بغيت الهرج ييبس لساني والذاكره عندي تقول معدومه قمت أتلفت وتسمع باذاني من شاف حالي ماتهنا بنومه مما بقلبي رحت بالليل عاني للموتر اللي مابقى ألا رسومه عن روحتي ياليت ربي نهاني ولا شفت دمه سايح في هدومه قمت ودفنته والله المستعاني في خرقة بيضا عليه محزومه يم القويعيه بلاد قحطاني والحر غير لون وجهي سمومه وأقفيت من عنده وعشري ثماني مثل المصبح والبلاد محكومه والله لولا ني وسيع البطاني لا صكها مثل أشقر الريش حومه طاوعت نفسي مير عقلي قواني عن الخطا ما فيه نفس معصومة |
رد: مجموعة قصائد ل احمد الناصر أنا البارحه قلبي تديره تفاكيره أهوجس ودمع العين وحده وثنتيني ألا واعذابي كان طالت بي السيرة أنا ويش اسوي كان طاول سهر عيني؟ نطحني غزال جافل شايف ذيره طفح شوف عينه من ورى الناس الاقصيني ألا ياعيون اللي كفخ وإنقطع سيره تلقى الخلا واقفى يرف الجناحيني عديم الوصايف مع هل البر والديره أنا قبل اشوفه شوف والله معافيني ألا واهني اللي تلمه به الجيره فراقه يموتني ولاماه تحييني من اخطا هواه اخطا من الخير والخيره ملكني تقول إمن إبن مروان شاريني وانا حالف بالله ماتبع هوى غيره أبتبع هواه وعن هوى الناس يغنيني |
رد: مجموعة قصائد ل احمد الناصر عابر وخطواتي مواقع للأزهار عابر خيالاتي مواسم سحابه عابر وابهدي للزمن كل الاشعار نزف القلم هم الورق والكتابه عابر وابنسف في شرايني اعصار جربت انا الغربه وشفت الغرابه عابر بلا تفكير مليت الافكار ومليت من طول الشقا والكآبه عابر بدون اسرار هو باقي اسرار حتى الالم صارت دروبه تشابه عابر وزادي بالسفر حب الاسفار عابر طريقي بين صحراء وغابه عابر وابنهي مرحلة نضجي الحار عابر وابلغي من عذابي عذابه في تربة الغربة نبت عندي اصرار وعما يقول الناس ما املك اجابه عابر واذا قررت ما حب الاعذار ويكفين وصف البعض بانسان نابه |
رد: مجموعة قصائد ل احمد الناصر البارحه واليوم عيني طواريها كثيره عيني طواريها كثيره وش اسوي بعيني ماجا خبر وعلوم وطروش من ديره لديره وطروش من ديره لديره يسلون الحزيني من ينصر المظلوم كوده الى سمع السريره كوده الى سمع السريره حكم بينه وبيني هجر وسهر وهموم ضاقت على كل الجزيره ضاقت علي كل الجزيره وانا ضلعي متيني لاهل الغرام سلوم ومصيبه الفرقى كبيره ومصيبه الفرقى كبيره عساها ماتجيني عيني تعاف النوم بالليل يالله الستيره بالليل يالله الستيره يبا الخافي يبيني نادو عقيد القوم ياقوم ملزوم استشيره ياقوم ملزوم استشيره لو انه مايبيني يازارع اليشموم ليتك تبيع بحسن سيره ليتك تبيع بحسن سيره علي او تشتريني ان بعت باول سوم سموك ابو خير وخيره سموك ابو خير وخيره وابو قلب فطيني رضيت بالمقسوم سافر عساها لك سفيره سافر عساها لك سفيره وانا وش في يديني انا له المحكوم ماهمني مخلوق غيره ماهمني مخلوق غيره بحبه مشتريني لو قيل لي منجوم راضي وخلوها قصيره راضي وخلوها قصيره ولا بيح كنيني |
رد: مجموعة قصائد ل احمد الناصر قصيدة طرق مسودس يزول عنك الباس/ ياللي شكيته/ ليت السلامه تنشرى عن ونتك نفداك /بالحال والمال/ جميع ماتملك يدي بين الرجا والياس /وقتي قضيته /ماباع حظي واشترى ماقدر على فرقاك/ والحب غربال/ ابديت جهدي واجهدي الهم والهوجاس/ كله خذيته /مافاد في شي جرى العام انا وياك/ ياسمح الاقبال /بالعز نمشي ونعدي اللي لقوه الناس/ قبلي لقيته/ جرح الموده مابرى ترى الشفا باشفاك /مار الدهر مال/ لاشك انا عنك محدي ودي بهرجه راس/ مع من هويته/ لكن سرى ليلي سرى واحترت وين القاك/ من كثر الازوال/ وسهيل بين والجدي جدر بليا ساس /مهما بنيته /مابه ظلال ولا ذرى ياقلب وش عناك/ والحب قتال /يقطعك يالحظ الردي عن سكته الافلاس/ قلبي نهيته/ يدري وكنه مادرى واليوم جاك مناك/ بالوان واشكال /تخطي وكنك مقتدي اخشى من الوسواس /قلبي عصيته /طلعت به طلعه كرى سبحان من خلاك/ للروح سلال /عندك عذابي واسعدي حب بغير قياس/ ليتي وليته/ بالخير والشر اخشرى صبر على بلواك/ للعسر حلال /من يجهل الدرب يغدي |
رد: مجموعة قصائد ل احمد الناصر ياناس قولوا لغض العود تكفون ياناس قولو له ما اشوف له من عذابي زود كثر التصاديد وش هو له ابو ثليل اشقر مرجود اسمع بذكره ولا اطوله وعيون نجل هدبهن سود يذبح بهن من يجي حوله ياكثر الأزوال بيض وسود ماهم بمثله ولا حوله عقب المودة جفا وأصدود ماشفت زول مثل زوله إن مت ابا القى عليه اشهود عنقه وخده ومجدوله أسهر وكل العيون رقود اليا تباطيت مرسوله يازين حبل الهوى ممدود لكن سجاياه مجهوله |
رد: مجموعة قصائد ل احمد الناصر نبذة عن حياة الشاعر أحمد الناصر الشاعر : احمد بن محمد بن ناصر الشايع ال موسى ال زمام المساعره الدوسري http://www.dwaihi.com/hm/pic/a-alnasser.gif العمر : 90 عاما ,ولقد بدأ الناصر رحلته مع الشعر في وقت مبكر منذ الصغر وتميز عن أقرانه الشعراء بدماثة الخلق ورحابة الصدر كما تميز أيضا بصوته الشجي وموالاته الجميلة وأشعاره الهادفة وألحانه العذبة، ونظرا لكونه يمتلك موهبة شعر المحاورة فقد جرت له الكثير من المحاورات الشعرية الرائعة مع كبار الشعراء الأفذاذ الذين عاصرهم الناصر وقد لقب بأمير شعراء الرد لكونه يتمتع بسرعة البديهة والذكاء الحاد، والأخلاق الطيبة، والاتزان داخل الميادين الشعرية والمحافل.. فقد أحبه الناس وارتبط بعلاقات طيبة مع مختلف شرائح المجتمع خاصة الشعراء، وبالرغم من أنه خطف الأضواء وكسب شهرة واسعة وقاعدة عريضة من جماهير الشعر الشعبية ومحبيه على مستوى الجزيرة وبعض البلدان العربية، إلا أنه يعد شاعرا متواضعا إلى أبعد الحدود وأكثر مما يتصوره البعض، وقد زاده هذا التواضع شهرة كبيرة واسعة بين الجمهور والنقاد وأصبح الكل يطرب به عاش طوال عمره في محافظة الزلفي بدا كتابة الشعر منذ الصغر في المحافظه و اول قصيده قاله عن محافظه ومسقط راسه الزلفي وهو دائما مايذكرها في ابياته وهو يعد من اقوى الشعراء على ساحه الشعر الشعبي والمحاورة ( المراد ) كما شارك ابو محمد في العديد من الأمسيات في بيروت و الدوحه والمنامه و دول الخليج العربي وبعض الدول العربيه ومناطق المملكه |
رد: مجموعة قصائد ل احمد الناصر بقايا جروح صح بدنك والله يسلم قلبك الروعةفي مرورك عزيزي أشكرك لمرورك وكلماتك الرائعة أسعدتني بردك الجميل وأنرت صفحتي المتواضعة دمت بسعادة |
رد: مجموعة قصائد ل احمد الناصر سلطان الشوق اخترت فأبدعت الاختيار قصائد جميله وجزله للشاعر الكبير احمد الناصر تقبل مروري |
رد: مجموعة قصائد ل احمد الناصر سـلـطـان الـشـوق روعتك كروعة الشاعر الكبير أحمد الناصر مبدع دائماً ولا حرمنا الله من إبداعك دمـــت بـخـيـر |
رد: مجموعة قصائد ل احمد الناصر سمو الاحساس .. لو بحثت في كل مكان .. في وسط صحراء او بتساااااااان .. فلن اجد .. نعم لن اجد مثيل لقلمك الفنااااااااااا اان الله يسعدك على مداخلتك الرائعه التي كانت ممزوجه بطعم العسل . لك الحب ياعسل ولروحك الطاهره اجمل التحايا والسلام .. |
رد: مجموعة قصائد ل احمد الناصر رقيق المشاعر مشكور على هالمرور الرائع والرد الاروع والإشادة الجميلة لاهنت ولا هان مرورك |
| الساعة الآن 11:52 PM. |
Powered by vBulletin® Version 3.8.7, Copyright ©2000 - 2026, Jelsoft Enterprises Ltd.
-
arab-line : Search Engine Friendly URLs by vBSEO 3.3.0 TranZ By
Almuhajir
... جميع الحقوق محفوظه لمجالس رويضة العرض لكل العرب ...
.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..