مجالس الرويضة لكل العرب

مقبل عليك بحب واشواق وشجون
وبداخلي كل الاحاسيس تختال

مجنونه فيني او انا فيك مجنون
ما عاد تفرق دامنا خبال فخبال

خلي العذارى في هوانا يغنون
للصبح لين يجرنا الصبح موال

ودي تعرف الناس وشكثر مفتون
باللي هواها يشرح الصدر والحال

يا تاج راسي ليتني كنت فرعون
واغرق في حبك وابقى للحب تمثال

ولا اكون اللي بغيتي لك يكون
مغرم متيم شاعر الحب خيال

مهوس حبك لا انا فيك مسكون
جنيتك دايم معي بكل الاحوال

لو خيروني بينك ومال قارون
لاختارك انتي مابها شك وجدال

دامك تمونين ايعقب غيرك يمون
راسي لجل راسك من المتن ينشال

مانيب احبك رمش وخدود وعيون
حبيتك اخلاق واحاسيس وافعال

فكري بناته من غلاتك يفزون
ماهو بتواضع مير تقدير واجلال

اهيم واديك بشعر حب موزون
واسعى ما بين الحب والشعر رحال

اشباه ليلى خلف سورك يصفون
والقلب حارس والمعاليق الاقفال

انتي سحابة شوق تمطرني مزون
وان جف ماها قلت تكفيني ظلال

مالك لو ماخون والله ماخون
عمرك سمعتي الطيش قد خان الاطفال

ولا سمعتي ابليس وابليس ملعون
صام رمضان وزاده بست شوال

ماخونك الا لا غدى القبح مزيون
ولا اشوف الذل بقلوب الابطال

هذاك وقتٍ كل شيٍ به يهون
حتى المشاعر فيه بالصدر تغتال

وشكثر احبك وشكثر كثر هالكون
مدري ترى ما شفت للحب مثقال

يمكن احبك الف الفين مليون
ولا احبك موت واموت بالحال

ما للمحبه عد او طعم او لون
ولا هي قصايد لا سرى الليل تنقال

هي الجواب اللي به الناس يلقون
تفسير فورة دم حرمه ورجال

وانا اشهد ان دمي ودمك يفورون
فورة مشاعر جيل من عرض الاجيال

منتي جواهر انتي الدر مكنون
من وسط قاع البحر شفتك على الجال

شفتك يقين يشيل عن متنه ظنون
وذبيتي شالك والحقه مني عقال

وقربت منك وانتي تمشين بالهون
وبستك على خدك تحت حبة الخال

وشفت الشفايف عضت لسان وسنون
كنهم يقولون الجفى يا الغضي طال

وراودت نفسي لا اضيع ويضيعون
لاني بجيب العيد في نشوة هبال

وصديت صدة يوسف وصحت تكفون
خلوا لنا في صفحة الطهر منزال

وقلتي احبك طيش واحبك جنون
ورديت احبك لكن بعقل وخبال

خالد القحطاني - وجد الكتابة