--}{ ماودّي اشرح لكن الشكوى للّه

لو شفت حالي عقب فرقاك وشلون
ماودّي اشرح لكن الشكوى للّـه
معك السعاده سافرت واظلم الكون
ووجيه خلـق الله عقبـك مملّـه
لا للفرح في دنيتي شكل لا لـون
وقتي عليّه سيف الاحـزان سلّـه
قلي وش اداري من جروح وطعون
وعيون تسهر لجلك الليـل كلّـه
ولا الهموم اللـي لحالـي يعـزون
ولاّ فـؤاد فيـه تسعيـن عـلّـه
ولا العواذل حولنـا وش يسـوون
ناس ٍ تفـرّق بيـن خـلّ وخلّـه
ولا الزمن والحظ من دون في دون
وميلات بقعى زادت الطيـن بلّـه
والمشكله واللي مع اوجاعي تهـون
عزيز قـومٍ جايـر الوقـت ذلّـه
اخطي؟ صحيح وباقي الخلق يخطون
راع المحبّـه دايـم ٍ فيـه خـلّـه
حتيش لو فيّه عيونـك يشوفـون
خطاي وتحاسب على كـل زلّـه
لو شفت عيني تنظر لكل مزيـون
لا تحسبـنّ الحـب ريـق ٍ نبلّـه
لالاولا تسرح وتسريبك ضنـون
وانته لقلبي يامنـى الـروح ظلّـه
لوشفتني بعيـون قلبـك يمـارون
ويصحى ضميرك والمشاعـر تدلّـه
لاتصدق العذّال واللـي يقولـون
لاشفتنـي تشهـد جميـع الادلّـه
حتيش لو عنـي يقولـون مجنـون
طفلٍ غريـر وزايـد الـود تلّـه
لو البشـر خانتـك والله ماخـون
حبّك وشق القلـب تلقـى محلّـه
منه المشاعر والاحاسيس يبكـون
والشوق منّي شامخ الدمـع هلّـه
يامعذبـي .. بالله بالهـون بالهـون
روحي معك من ظلمنا مضمحلّـه
بالله ما حسيـت يافتنـة الكـون
فأنـواع تعذيبـك بدقـه وجلّـه
شفني هنا وهناك وهنـاك محـزون
ياللي عقـدت الحبـل لازم تحلّـه
ولو مرّت الذكرى ثوانـي يهلّـون
طفلين في قلبك تحسـب الاهلّـه
اعوامهم ستّـه ويمكـن يزيـدون
عاشت رغم جور الزمن مسفهلّـه
وقّف على الاطلال والناس يوحون
نصرخ بصوتٍ واحد الشكوى للّه



وسلامت قلوبكم