فز الخفوق

السلام عليكم
شلونكم طيبين انشاءالله

اليوم جايب لكم قصيده لشاعر دايم السيف الامير خالد الفيصل قصيده احب ان ارددها دايم وحبيت اني انقلها لكم هنا هي قديمه شوي بس المثل يقول قديمك نديمك :$
مراح اطول عليكم الكلام اتركم مع القصيده وهي تعبر عن نفسها


فزّ الخفوق وقلت يالله عسى خير
أثر الليالي عـاد غايـب قمرهـا


مع شوفته نشوه و فزّه و تخديـر
و عيون خلاّن(ن) تعانق نظرهـا


يفزّ له قلبـي كمـا فـزّة الطيـر
و الرجل كن اللي تحتهـا غدرهـا


يا صبح عمري يا صباح التباشير
نوره ملا قلبي و روحي غمرهـا


عقب الفراق اللي تعدّى المحاذيـر
يبّس غصون القلب جافي دهرهـا


ربّع بروحي عقب ماهي معاسيـر
سحابة(ن) هلّـت بقلبـي مطرهـا


و اسقَى بها زرعة هوانا بتقديـر
غرسة غرام(ن) بالمحبـه بذرهـا


يا عاذلين العيـن والله مخاسيـر
و اللي درَى عن حال عيني عذرها


تشوم عيني عن جميـع الغناديـر
و إن ناظرت عيني فوادي نهرهـا


يا ناس احبه و المحبـه مقاديـر
هذا هوَى نفسـي و هـذا قدرهـا


و الحب ماله يا اهل الحب تفسيـر
قلبيـن و الله بالمحبـه امـرهـا


لا جيت اصوّر حالة الحب تصوير
و أرد عن حالـي لخلّـي خبرهـا


لقيت وجدي فـوق كـل التعابيـر
كل الشعر قطره و شوقي بحرهـا

دمتم بوووووووووووووو وود