مجالس الرويضة لكل العرب - [®][^][®][رحلهـ مع عضو ][®][^][®][

بسم الله نبدأ وعلى ارتفاع 35ألف قدم تحت سطح البحر نبحر بكم جوا ههههههههه

1-- أول سفرة لي محليا كانت من (الرياض -- جده ) وبرفقتي العضو برق الشمال أتوقع قبل 25عاما على طائرة بوينج 737 ومن قوة المطبات والخرشه اللي صارت للمضيفين اظنه صار فيها خلل فني قامت تشيل بنا فوق وتضرب بنا تحت حتى ان طاولة الاكل سقطت على الممرات والتفت اشوف برق الشمال وهو اصغر سنا مني وجهه اصفر دمه خلص مات الرجال احاكيه ما يتكلم وكلنا خايفين شفنا الموت واستمر الوضع حوالي 10 دقايق وفرجها الله اعتدلت الطياره ووصلنا بسلام ولا زال برق الشمال يتذكر هالموقف حتى الان .

---- أول سفرة للخارج كانت الى بانكوك عاصمة تايلاند سياحه عام 1406هجريه ومدتها 8ساعات طيران .

2-- أطول سفرة كانت من (بكين الى دبي ) 9ساعات ونصف .قبل عدة اشهر من الان

وكذلك رحلة عمل الى تشاد طلعت من الرياض الى القاهره ساعتين ونصف وبعد انتظار 6ساعات طلعت على الخطوط الفرنسيه 6ساعات الى مطار بن غوريون في باريس وانتظار في المطار 8ساعات ومن ثم الاقلاع الى تشاد 6ساعات وهذا قبل عام في رحلة عمل لتقصي حقائق لاجيئ دارفور على الحدود التشاديه وعلشان ناصل للحدود التشاديه السودانيه استقلينا نحن الوفد واحد بريطاني وواحد امريكي ومصري من لندن يمثل جريدة الحياة ولبناني يمثل جريدة الرأي الكويتيه ومترجم سوداني طيارة صغيرة عدد مقاعدها 6مقاعد ولمدة 4ساعات طيران متواصله وقائدها طيار من جنوب افريقيا كبير في العمر لو جاه سكته قلبيه تورطنا مامعه مساعد ومن شروط السلامه عدم التحرك او فك الحزام طوال الرحله ولا يوجد دورة مياه كل واحد معاه علبة موية صحه كبيره للطواريء وكانوا نصحونا ما نفطر الين ناصل ههههههههه ومنع الحركه حتى لا تهتز الطائرة وتطيح ونزلنا في ارض ترابيه وسبق نشرت تحقيق بجريدة الرياض وطلعت فيه الطياره اللي اصغر من الددسن .

3- أحلى بلد زرته ومالذي شدك إليه ؟ كثيرة البلدان الحلوة وتختلف لكل دولة ميزة طبعا مصر ام الدنيا وماليزيا وتايلاند والصين واليونان وسيرلانكا وتركيا والتشيك وطاجيكستان وكوسوفا والبانيا -باندا تشيه

وجزر المالديف والمانيا لكل دولة ميزة معينة وتبقى ليبيريا في افريقيا من اجمل البلدان طبيعة تغطيها المياه والاشجار الكثيفه حتى ان الزائر مايشوف البيوت من كبر حجم الاشجار اللي تغطيها عيبها انتشار الملاريا .

تشدني الطبيعة اولا وهذه الدول من اجمل دول العالم طبيعة باستثناء مصر شدني اليها ليلها وضوضائها وطيبة شعبها وحبهم للنكته وفي كوالا لمبور برجي التاور -

4- - لو شاءت الظروف وان شاء الله ما تشاء من غير شر احلى بلد ارغب العيش فيه فرنسا .

5- وزني 62كيلو لهذا مااهتم بالاكل كثيرا احب السلطات الخضراء والسوب سواء شوربة خضار او سي سوفت او عدس واي شيء يعجبني من البوفيه اختاره بغض النظر عن الاكل هل هو من نفس البلد ام لا عدا اكل اللحم المشوي في موريتانيا والنيجر هذا شيء خرافي لانهم يعلقون الذبيحه على النار ويشوونها بطريقة عجيبه ويطلع لها نكهه علما انها بدون بهارات واحرص على الاستكوزا في السنغال الوحده اكبر مني هههههههه.

6-- طرفه صارت لك في احدى اسفارك ولا زلت تتذكرها ؟ في الجو وحنا جايين من القاهره وقبل الرياض بحوالي 40دقيقه قربعت بنا الطياره فوق تحت وكنت جاي من دورة المياه تكرمون وعجزت اصل للمقعد اقوم واطيح من قوة الارتطام ويوم وصلت مقعدي كان بجواري زميلي احمد المصيبيح التفت عليه من هول المصيبه وقلت له والله اللي ماعاد شفناعيالنا وكانت بجوارنا مصرية معها طفل رضيع اول مره تركب الطيارة جايه لزوجها بالرياض صابها هستيريا وصارت تصيح نزلوني نزلوني قلت تشهدي يابنت الناس حنا في السماء وشلون ينزلونك وكان ورانا شباب مهايطيه يضحكون شوي وصاروا كل اللي في الطياره يبكون اولهم المهايطيه وهبطت بسلام وكان الخلل تعطل احدى محركاتها حدث ذلك قبل 6سنوات تقريبا .

اما اطرف موقف فهو اني سافرت للقاهره وعمري 17 سنه اول مره قروي ولا اعرف شيء اخذني راعي التاكسي في المساء لشقة واستاجرتها لمدة اسبوع وكان مافيها الا لمبتين كهرب ويوم جاء الفجر واسمع الازعاج طلعت لقيت عمال يسحبون الحديد يطلعونه فوق والاسمنت عرفت انهم ضحكوا علي وسكنوني في شقة بعمارة توها تعمر هههههههههه ورجعت ثاني يوم للرياض خلصت فلوسي ولعبوا علي المصاريه هههههههه وياما من المواقف .

5- أجمل تذكار احتفظ به صوري مع اسرتي في ماليزيا وبيروت ومصر ودبي والبحرين وهناك تذكار احتفظ به وهو هدية من الرئيس السنغالي عندما اجريت معه مقابله في قصره .

6- اتمنى زيارة لندن مابعد زرتها واتمنى حديقة الهايدبارك وموجوه صورها في كل مكان مايحتاج ابحث عنها .

7-- اجمل مكان شفته بسفرك ؟ جبال وأودية كشمير المنطقة اللي يسوون فيها الهنود مسلسلاتهم جنه من جنان الدنيا .

8- كم مره سافرت بحياتك ؟ زرت اكثر من 80دوله يعني نصف دول العالم اما عدد السفريات الخارجية تتجاوز 200سفره .

9- دوله اعجبك التسوق فيها ؟ انا من محبي الشوبنق وشيء اساسي في بكين عاصمة الصين مولات متعددة الادوار ومنها مول 6 ادوار خاص ببيع الشاهي الاخضر فعلا التسوق في الصين غير .
10- اخر بلد زرته ؟ قبل ايام سيرلانكا والمالديف وقبلها باسبوع اندونيسيا وبعد ايام للتشيك والمانيا .

11- شيء لا تستغني عنه غير المصحف والسجاده ؟ عدة كتب ابتسم لعايض القرني و90 وصيه لتكون ناجحا اعلى كتاب مبيعات بالعالم مترجم وكتاب غازي القصيبي فن الادارة وكتيبات شعر لنزار قباني وكتب عدة مترجمه لمستشرقين لاني احب القراءة في السفر بشكل جنوني .
12- أجمل مطار شفته ؟ مطار ابن غوريون في باريس الطيارات ماسكات سرى على المدرجات للاقلاع ذكرتني بسيارات الليموزين عند المطار ههههههه

13-- كلمه ونصيحه : السفر به 7فوائد فعليك الاستفادة من تلك الفوائد وقبل السفر البحث في قوقل او زيارة سفارة البلد اللي بتروح له لتتعرف على عاداتهم وتقاليد الشعوب واماكن السياحه والاشياء التي يستعيبونها يعني كوّن فكرة كاملة عن الدوله اللي بتزورها ولا تبين للناس هناك انه معك فلوس والا ولد نعمه حتىالساعه لا تلبس ساعه ثمينه والملابس على قد مايلبسون او اقل ولا تخرج الفلوس قدام الناس وسجل جوازك بالسفارة فور وصولك وانتبه لاتتعرف على اي عربي في اوروبا كلهم نصابين واذا قالوا تعال يمين رح شمال وفلوسك خلها عن طريق بطاقة الفيزا لا تشيل فلوس الا اللي تمشيك كل يوم بيومه ولا تحمل الدولار للدول الاوربيه اصرف اليورو ولغير الاوربيه الدولار ولا تصرف عملتهم من المملكه اذا وصلت بدل العمله ولا تشيل سعودي معك .

---------------------- وسلامتكم --------------- تسلمين اسيرة الصمت ---------

نحمد الله على سلامة الوصول الى مطار مجالس الرويضة ونتمنى ان نلقاكم على احدى رحلاتنا القادمه .

ولأن الموضوع لازم تختار وقع الاختيار على (ابونواااااااااا ااااااااااف ) تفضل