مرثيه ابراهيم (ابو قميش) في الخال عبدالله

مرثيه في الخال عبدالله بن عبدالرحمن بن براهيم المحسن. يرحمه الله...
اثر تعرضه لحادث مروري انقلاب في المزاحميه مساء الاثنين واليكم القصيده :

جانا الخبر صبح الثلاثاء عن الخال
بجماد الاول يوم سبعة عشر فيه
قالوا وفى يومه وتمن الآجال
واللي بسط عمره هو اليوم طاويه
وبكيت أنا والدمع من ناظري سال
وربعي بكوا والحضر والبدو تبكيه
لا والله الا راح للربع رجال
ماجا لهم مثله ولا حدن يحاليه
راح الهريش عبيد اللي ليا قال
سمعت له الدنيا ولبى مناديه
ماله وصيف ولا شبيه على حال
سبحان من بالخير خصه ومعطيه
راع الكرم والجود والجاه والمال
واحد زمانه رافع المجد بانيه
رجلن يشيل احمال عسرات وثقال
كم واحد عنها تقاصر هقاويه
لاجاله المقهور وسع له البال
وفتح له الابواب من فضل اياديه
واليوم راح من الوطن طيب الفال
واقفى وذكره باقي عند طاريه
وهذا قضا ربي على كل الاحوال
مكتوب والمكتوب ماحدن جزع فيه
عسى الولي يجعل له الخلد منزال
ويثبته لا قام في الحشر داعيه


شعر/براهيم بن عبدالرحمن المحسن

رحم الله المتوفى عبدالله بن عبدالرحمن المحسن

و صح لسان الشاعر ابراهيم بن عبدالرحمن المحسن

و الشكر موصول لك اخي السفير

الله يرحم عبيد الهريش

وصح لسان الشاعر ابراهيم

وكل الشكر لك يالسفير على النقل

صح لسانك ،،ورحم الله المتوفى واسكنه فسيح جناته

يامال الجنة ياعبيد ابن محسن..

الله يرحمة ويغقر لة..


وصح لسان ابو قميش..

لاهنت يالسفير