مجالس الرويضة لكل العرب

مجالس الرويضة لكل العرب (http://www.rwwwr.com/vb/httb:www.rwwwr.com.php)
-   مساحة للضحك والفرفشة (http://www.rwwwr.com/vb/f15.html)
-   -   مقالب ليلة الزواج‏ (http://www.rwwwr.com/vb/t23296.html)

أياس 07-04-2009 09:31 PM

مقالب ليلة الزواج‏
 

السلام عليكم و رحمة الله و بركاته


الموقف الأول : بوكيه ورد

هذا الله يسلمكم .. ليلة زواج العريس ,, كان مجتمع مع اخوياه بالاستراحة ... تعرفون بكره زواجه وقال آخر ليلة ابيها مع الشباب بالاستراحة ... عاد من ضمن السوالف ، قالوا هاه وش تبي نسوي لك مقلب ؟؟ قال لا هين ما تقدرون ..قالوا شف المقلب مسوينه مسوينه .. مير تبيه بالقصر والا قبل لا تروح والا بالفندق
الرجال مسكت معه وقال أبد تحدي .. ماتقدرون تسوون فيني مقلب
تزوج الرجال وتوجه للفندق مع عروسته .. وتوهم داخلين الفندق وجالسين أول ليلة ،، والفندق مرتب ومتكتك .. رن جرس الغرفة .. فتح واثره العامل اللي يشتغل بالفندق ومعاه سلة فواكه .. هدية من الفندق للعرسان
اخذها وحطها عند العروس .. جلس شوي ورنّ الجرس مرة ثانية ، راح فتح الباب واثره العامل معه بوكيه ورد وفيه كرت
أخذ البوكيه وحطه بالغرفة .. على أساس إن البوكيه هدية من الفندق لهم ، استأذن زوجته بيدخل دورة المياه - الله يعزكم - فزوجته كانت تبي تشوف الكرت اللي في البوكيه .. وش مكتوب فيه .. وكانت الصدمة :
ألف ألف مبروك الزواج .. وأتمنى لك التوفيق في حياتك الجديدة
..أموله..

انهارت الزوجة !! منهي أموله ؟؟؟ وفي ليلتي .. تبارك لزوجي وبكل وساعة وجه !! طلع زوجها من دورة المياه واثر زوجته تصيح وتشاااهق .. وش فيك يابنت الحلال ؟؟ وش صاير .. عطته الكرت اللي بالبوكيه .. الرجال انهبل .. قسم بالله ما اعرفها ولا ادري منهي .. والبنت مسيكينة الدموع اربع اربع !!! شوي ويرنّ الجرس مرة ثانية .. واثره العامل معه بوكيه ورد ثاني ومعه كرت
مكتوب فيه :
ألف ألف مبروك زواجك .. ونتمنى لك التوفيق في حياتك الجديدة
أخوياك بالاستراحة ( أموله )
والرجال يوريها زوجته .. شوفي قسم بالله انهم اخوياي .. هم اللي مسوين المقلب .. وبالأخير اقتنعت البنت !!!

يعني خربوا عليه أول ليلة في حياتهم .. بسبب هالتصرف !!!!!

***

الموقف الثاني : بخاري

هذا واحد قرر يتزوج ،، ومشت أموره تمام .. وقالوا له أخوياه .. ترى لازم حنا نسوي لك شي في يوم عرسك .. وترى حنا اللي راح نجيب لك العشاء اذا رحت مع زوجتك للفندق .. بنتكفل فيه وبنجيب لكم شي مرررتب
الرجال قال أبد ياشباب ماتقصرون ويكفي شعوركم .. ومن هالكلام
واحد من الشباب قال للباقين .. تكفون خلوا العشاء علي انا لحالي ،، الرجال هذا من أعز الناس عندي .. وودي يوم عرسه أجيب له أنا عشاه .. وخلونا حنا مرة ثانية نجيب له شي يصير مننا كلنا .. قالوا دام كذا أجل خلاص
تزوج اخونا في الله وراح مع زوجته على أساس إن خويه هو اللي بيجيب له العشاء ويوصله للفندق بنفسه
بعد ماجلسوا فترة بالفندق .. رنّ الجرس وفتح العريس الباب وأثره خويه
والمصيبة إنه جايب له العشاء كيسة رز بخاري وبصل وجرجير
ويمدها له وهو ميت ضحك
وش موقف الزوج ؟؟؟؟؟؟؟؟؟؟ أترك لكم التعليق

***

الموقف الثالث: النور

هذا واحد تزوج وراح مع زوجته لبيتهم الجديد والمعاريس جالسين ومستحين .. وصحن فواكه .. وعصيرات وكل واحد يسترق النظرات .. وطاقتهم أم الركب وحالتهم صعبة !! شوي الا يطفى النور
يااااوك وش السالفة .. طلع الزوج وفتح الطبلون حق الكهرب واشتغل النور
رجع مرة ثانية .. وطفى النور .. وراح مرة ثانية وشغله
ومرة ثالثه ورابعه وخامسه !!! وجلس على هالحالة من 12 بالليل لين أذن الفجر خخخخخخ .. والسبب ؟؟ أخوياه يبون يسوون فيه مقلب .. يعني يالله خربوا أم أم الليلة عشان ضحك واستهباااال

***

الموقفالرابع: مقلب عكسي

هذا واحد قرر يتزوج .. وقرر أنه هو اللي يسوي بأخوياه مقلب ،، يعني يتغدا بهم قبل يتعشون فيه
قال لأخوياه انه نوى يتزوج وكذا .. وجلس يستعد للزواج ،، ومن ضمن الاستعدادات .. طباعة كروت الدعوة
طبع كروت دعوة للأقارب والأهل بمكان القصر وموعد الزواج وكل شي .. وطبع كروت زواج خاصة لأخوياه .. وكتب فيها موعد الزواج يختلف عن موعد زواجه الفعلي بيوم ... وكتب فيها ان الزواج بيكون في البيت
الشباب اخذوا البطاقات .. وشكلهم كانوا ناوين يسوون فيه مقلب يوم زواجه
طبعا الرجال تزوج وعدت ليلته الأولى من أروع مايكون .. لا مقالب ولا هم يحزنون
يوم صار من بكره .. اللي هو موعد الزواج الوهمي لاخوياه خخخخخخخخخخخ لبسوا الشباب واللي راح الحلاق يكشخ .. وراحوا لبيت المعرس !! وش السالفة .. غريبة وين المعازيم ؟؟ مافيه الا سيارتين او ثلاث عند الباب
دخلوا .. ويسلمون على اخوان المعرس .. ويجلسون شوي بالمجلس .. ماش مافيه احد .. مب جو عرس !!
ويروح واحد يسأل اخو العريس .. وين فلان ؟؟
قال .. سافر
قالوا وش اللي سافر ؟؟ عسى ماشر بس ؟؟ وزواجه اليوم ؟؟؟؟
قال .. زواجه امس ... وسافر اليوم الصبح هو وزوجته

وتراه قايل لأهلي انكم بتجون عقب عرسي بيوم .. وترانا مسوين لكم عشاء وشغل مرتب .. والله يحييكم

بصراحة اعجبني خخخخخخخخخخخخخخخ

محمد 07-04-2009 09:56 PM

رد: مقالب لليلة الزواج‏
 
ههههههههههههههه هههه

يسلمـــــــــــ ـ ايـــــــاااااس ــــــــو

محمد 21-04-2009 04:37 PM

رد: مقالب لليلة الزواج‏
 

قوييييييييييييي يييييييييييييه

محمد 26-04-2009 04:21 AM

رد: مقالب لليلة الزواج‏
 
ههههههههههه

والله حرام مقالب تعور بالقلب

سمو الاحساس 26-04-2009 11:42 AM

رد: مقالب لليلة الزواج‏
 
مشكوووور اخوي الله يكفينا شر هالمواقف

محمد 26-04-2009 02:00 PM

رد: مقالب لليلة الزواج‏
 
هع هع

وناسه والله هالمقالب أنا اذكر واحد من الشباب
بليلة عرسه طبعًا كان عرسه بجده وكلكم تعرفون القصور بجده
الساعة 3 الفجر وتوهم مازفوا العروس وحينها قمنا بتبديل سيارة المعرس
لأنننا اصلاً كنا مخطيين يوصلهم للفندق اخو العروس وبعدين يرجع السيارة وهم هناك
معهم سيارة ثانية حيث وضعنا بالفندق سيارة مكسرة ورايحة فيها وغيرنا قفل الباب
من شان يشوف المفتاح جديد ويصدق اننا مسـاجرين له سيارة كشخة الرجال راح الفندق
والصباح يبي يمشي الهانم على البحر وراح يدور السيارة بالبدروم تبع الفندق ومالقى ولا سيارة
غير هالمكسرة وقال خلني اجرب واشوف كم كانت مصيبته يوم فتح وصارت هي سيارتهم هههههههه

hamo0ode 26-04-2009 02:19 PM

رد: مقالب ليلة الزواج‏
 
ههههههههههههههه هههههههههه

قويه مره ..{ :)

ذيبان 03-06-2009 12:10 AM

رد: مقالب ليلة الزواج‏
 
قصص المعاريس واجد
هذ طال عمركم ولد جيرانا وليد سووا في العريس عبدالله منكح خطير جداً

تحسبونها على عشاء... على بوكيه ورد...
مالكم بالطويلة ..
هذا عبدالله ولد الجيران كنا جالسين قبل زواج عبدالله بيوم قالوا العيال ترقب المقلب والمشكلة أن عبدالله جبان الحاصل مشى عبدالله لبيتهم وكان عندنا نسيبه الجديد يقرب له نايف وش نسوي به ياعيال ويجيك المهبول وليد (جارنا بعد ) قال عندي المقلب ياعيال خلوه علي بس أبي نايف يساعدني ويحاولون في نايف آخيراً وافق ويطلع وليد قال الوعد بكرة
أبن الذين آمنوا راح وشرى له.. شرعة عروسة !!!
وقال يا نايف بكرة بنخليه يسري بدري من القاعة وانا بلبس ذا الشرعة وبجلس في مجلسكم ودخله علي
قال نايف خلاص
الوكاد حضر وليد الزواج وطلع قبل مايمشون ويسوق به نايف ويدخله على وليد ..ونايف مو مصدق اللي بيصير ويجيك العريس عبدالله ويتميلح عند المدام(وليد) ويشرب عصير ويمسكها بيدها ويطلع بها للفندق ويقعد يتميلح عليها ويتضحك ويده في يد المدام ونايف يسوق وموديهم للفندق اللحين
>>نايف متوقع المقلب قصير مادرى أن وليد ناوي له نيه
الحاصل نزلوا من السيارة والعروسة (وليد) يتكسر ويتلوى.. ثم راح نايف وجاب أخته العروسة الحقيقية الحاصل يقول وليد دخلني في الفندق ويقول شوي شوي بالهداوه بالراحة ويد بيدي ويد على ظهري الحاصل رحت وجلست على السرير ويجيك عبدالله واثق ويفسخ البشت و الشماغ والعقال ويجلس جنبي وانا منزل راسي تحت وميت من الضحك ويمد يده علي وهو مرتبك ويده ترتعد يبي يرفع غطاء الشرعة وانا أبعد راسي منه وأتدلع يقول وليد انا عجزت أتحمل المقلب خلاص أستسلمت العريس لوح مايقدر الحياة الزوجية الوكاد وهو يرفع الشرعة بقوة وتطلع السكسوكة والشنبات وهو يصعق ولا رده إلا الحمام وانا ماصدقت إنه يقوم وأنحاش مع الباب يقول ويطاردني مع أسياب الفندق بالعقال ويقول ما آمداني أوصل الباب لـ ذا نايف داخل بالعروسة الحقيقية ونجيه وناخذه من الفندق ويوم جاء العريس من شهر العسل طبعاً زعلان من الحركة و توسطنا لـ وليد ورجعت العلاقة.. أنتهى المقلب الثقيل اللي جعله مايحصل لي ولا لكم

ابو طارق 07-06-2009 02:18 PM

رد: مقالب ليلة الزواج‏
 
ههههههههههههههه ههههههههههه


يعطيك العافيه


الساعة الآن 05:40 AM.

Powered by vBulletin® Version 3.8.7, Copyright ©2000 - 2024, Jelsoft Enterprises Ltd.
- arab-line : Search Engine Friendly URLs by vBSEO 3.3.0 TranZ By Almuhajir

Ads Management Version 3.0.1 by Saeed Al-Atwi

HêĽм √ 3.1 BY: ! ωαнαм ! © 2010

... جميع الحقوق محفوظه لمجالس رويضة العرض لكل العرب ...

.. جميع المشاركات المكتوبة تعبّر عن وجهة نظر صاحبها ...ولا تعبّر بأي شكل من الأشكال عن وجهة نظر المنتدى..

a.d - i.s.s.w