• قصيدة الشعل
 

هذي قصيده الشاعر خالد السبيعي ونقته لكم


مقعد تهيّض بشوف الوسم وبكوره
وأرسل سلامه مع المندوب لأقرابه


يذكر ديارٍ بمزن الغيث ممطوره
وده بشعلٍ لأبو ضيدان ترعابه


والشعل معنا يا خوي اليوم مبروره
لو كان دهرٍ يشيب الرأس بأسبابه


نرخص لها الروح والأحوال مستوره
والظن في واحدٍ ما خاب طلاّبه


وأفضال ربي كثيرة دوم منشوره
(وليا انقفل باب غيره ما انقفل بابه)


وإن قّدّر الله وحلّت كل معسوره
يجيك بوشٍ وكلٍ يحسب حسابه


يجيك بوشٍ يعزف ألحان منصوره
أحدٍ تغداه والثاني تعشابه


كم من عنيدٍ يشوف بعين مكسوره
بأسباب فعلٍ نهار الورد يدرابه


قالوا هجيجٍ وكلٍ فك مقهوره
أحدٍ يلوّح وغيره يشعب ركابه


يوم اختلط عجها بذيدان مسعوره
وأصبح نهارٍ غدا للبوش ضبضابه


كلٍ عرف هقوته فيها ومقدوره
أما قنع طيب وألا غصب يرضابه


يضحك مع الناس وألا الكبد ممروره
الذود غرّه ردي الحظ وأغوابه


بأسباب شعلٍ لأبوضيدان مخبوره
تركي مطارق بقلب الحسد وأصحابه


لامن زهمها تجيك الشعل مذعوره
كنّه يزوّلها قومان وحرابه


تقودها فاطرٍ في الذود مصطوره
على الغناوي تشوش اليوم طرّابه


حلّيها دلة الرسلان بالصوره
في ضف ربعٍ لهم نيران شبابه


وألا كما قايدٍ للبيض مغروره
قامت تمدرا لعرض الزين نصّابه


نرعى بشعلٍ مع البدوان مشهوره
شعلٍ تشوق النظر بالزين جذابه


نسوق شعلٍ تنومسنا ومذكوره
ما هي حراسيس وسط شبوك حلابه


لينا وفيحان لامن فاحت زهوره
نرعى زماليق نبتة قبل يثعابه


مدهال بوشٍ يسر العين بقفوره
جعل الهماليل دايم تسقي ترابه


وشعيل زين السجايا وافي شبوره
الطيب كسبه ورأس المجد يرقابه


وأنا عضيده وشوري دوم في شوره
من نسل عودٍ نهار الضيق يعدابه


حنا سبيع أهلها من فايت عصوره
وليا بغاها عدوٍ نقصر أشنابه


كم من عقيدٍ نكس يمناه مبتوره
وكم من عقيدٍ في المضمى عرجنابه


ربعي تدوس الخطر والقوم مدحوره
ومن لا يدوس الخطر فالذل يضرابه


وفعولنا في علاو المجد مسموره
لاد القريشي سنام المجد وهضابه

يعطيك العافيه حبه كرز على مرورك الكريم والف شكر

مشكور تركي على النقل الجميل

الله يعطيك العافيه

قصيده جميله جدا

سجل اعجابي

الله يعافيك

والاجمل مرورك الكريم

شكر لك

فهد اهم شي القصيده حازت على اعجابك

شكر على مرورك

هذا نبطي مب ادبي

شكر علبى مروورك