مجالس الرويضة لكل العرب - شكراً يابوش .. للشاعر عبد الناصر حجازي

شكراً يابوش
دخّلت جزمتنا التاريخ
وخرجت منه بفردتين جزمة
طب كنت فاكر إيه؟
هيقابلك اولادنا اليتامى بورد وبنياشين؟
ولاّ الأرامل لمّـا هيشوفوا خلقتك هيزغردوا؟
ماشيىء طبيعى ان التراب اللى انت نجّسته بجنودك يتنفخ فى عنيك
وشيىء طبيعى ان الرضيع اللى اتفطم م الجوع يتفّ عليك
ماتبص فى إيديك .. تلقى دم ولادنا لازق بين ضوافرك
ماتبص للورد اللى مزّعته بحوافرك
ماتبص بعنيك .. اللى دود الأرض كلها بالحيا
هتشوف بيوتنا اتعسكرت
والميّـة فى النهر بدمانا اتعكرت
وستاير الشبابيك مخرّمها الرصاص
هوّ انت فاكر اللى فات مات والبلد صبحت خلاص مستعمرة؟
هوّ انت فاكر لو مشيت نحْيتنا خطوة لابد نرجع لك ورا ؟
ماقريتش ليه كتب التاريخ من فبل ماالجغرافيا تستهزأ بحلمك..
وتشتتك فوق الخريطة ..
فـ تحطّ رجْـل ف كل بيت مانتش شاريه ؟
أدمنت صبّ الشمع فى ودانك عشان ماتسمعش الأدان
وقبلت تنهش فى الميدان أعراض حريمنا
فكان لابد وْلاد حريمنا يقدّمولك لمّـا جيت..
أحدث تحية عسكرية (بالجزم)
وجزمة العربى بصراحة أثبتت من حيث مقاسها إنها..
أطول من (المسيسيبى) واوسع من (شيكاغو)
الجزمة حطّت حلمك الأمريكى فى (القالب)
و(اليانكى) فوق (شط العرب) (منداس)
والفضل يرجع لك فى (تلميع) القضية
أما الشرف فـ لصاحب الجزمة
والخوف لاتبعت كل أفراد (المارينز)يلمّـ وا من سوفنا الجزم
ويقبضوا..على أى تشكيل يجتمع (على مدخل الجامع)
بدعوة انها أسلحة (غير تقليدية)
ومش بعيد تبعت صاروخ على (باتا) ينسف ترسانات الأسلحة
وتحطّ إسم (الموسكى) فى كشوف الخلايا الإرهابية
بس الغريبة انك يابوش..
مارضيتش تنحنى للشعوب ولا للإلـه
بس انحيت لفردة الجزمة
و(منتظر) صبح الوحيد الـ (منتصر)
وجنب صورة مشنقة صدام لزق صورتك ..
لحظة ماكانت جزمته مستهدفاك
واستهدفوه عملاءك الجواسيس
وزى ماانت (دبحت) فى العيد (الضحية)
جه (منتظر) (يرجم) فى نفس العيد (إبليس)
وبقيت يابوش..
أول رئيس أمريكى نقلع له الجزم
و(منتظر) أول مواطن فى الوجود دخل التاريخ (حافى)