بلسان شيخٍ يكرم الضيف والجار = أبو علي مَلفى الضيوف الحشامي
يا مرحبا يا أمير يا واف الأشبار = واللي حضر وأعداد وبل الغمامي
يا أمير ياللي لك معزة ومقدار = بقلوبنا ويطيب فيك المقامي
والمدح جاله في أهل المدح مشوار = وتستاهلونه يا عزيز المقامي
والمدح ما جاكم بتلفيق الأشعار = انتم هل التاريخ طول العوامي
وانتم هل الطولات وانتم هل الكار = وأهل الوفاء وأهل الكرم والحسامي
وانتم هل العوجى عمى عين الأشرار = كم واحدٍ مما يشوف استقامي
وانتم هل المجد المدون هل الدار = أبطال ما تِزحم نهار الزحامي
وانتم لشرع الله حليفين وأنصار = ولولا الشريعة ما استقام النظامي
يا حر يابن الحر يا ذخر الأحرار = متربع بين الخوال وعمامي
فهد صليب الرأي محمود الأذكار = طلق الحجاج ولشكالات رامي
يا طيب هوماته ويا طيب الأفكار = شخصيته تحظى بكل احترامي
متسلسل من روس حكام وأخيار = آل سعود وحي ذيك الاسامي
أسرة عدل والفخر بالقائد البار = عاش أبو متعب والوطن ما يضامي
مليكنا اللي للوطن عز وستار = يذود عن شعبه وداعي سلامي
ملك حكيم وعند الأزمات ماحتار = رأيه رشيد ونظرته للامامي
ما ينحني إلا لعلام الأسرار = للواحد المعبود رب الانامي
وللمسلمين حجاب في كل الأقطار = يبرز إلى جاء في العلوم انقسامي
وعلى يمينه صيرمي ٍ وبتار = سلطان ستر مرودعات الوشامي
درع الوطن عن كل طامع وغدار = لاجا نهارٍ فيه مثل العسامي
وزير للي ما يهابون الأخطار = بواسل عن حدها ماتنامي
ويمناه غيث اللي عليه الدهر جار = عدٍ يصدر من يجونه حيامي
وحكامنا منا لنا تاج وشعار = نعم الملوك اللي عطونا اهتمامي
والحكم ما جاهم بتصويت وشعار = جاء بالسيوف اللي تقص العظامي
من كف أبو تركي بعد ماخذى الثار = في ليلة للقصر فيها ازدحامي
هجد على عجلان في وقت الأسحار = وحذف براسة وأشقر الدم زامي
ونادوا بعالي الصوت مع طلع الأسفار = يا أهل الرياض الفيصلي الإمامي
وتبدل العسر بيسر عزم وإصرار = طوي الجهل وانزاح هاك الظلامي
عساه في الجنة بعيد عن النار = جمع قبايلها على امن وسلامي
وامن الوطن غالي وتفداه الأعمار = واللي يمس أمنه عساه العدامي