واعدتها باخر دقايق ليل لا حان (الفجر)
قلت اسمعيني (يافجر) ماخلف وعودك وش يصير
وجتني على نفس الوعد بالضبط خمس الا عشر
وانا على نفس الوعد نايم وباحلام وشخير
ياحسرتي ضيعتها كله سبب ذاك السهر
ولا وعيت الا على صبح وعصافيره تطير
وقمت اتجهز للعمل ماعندي وقت ولا صبر
واسوق بقصى سرعتي اخاف من هوش المدير
وكل الشوارع واقفه زحمه وصبات وحفر
ودي بساعتها مثل (بات مان) اخربها واطير
كله مابي مديرنا يشطب على اسمي بالحمر
دايم على باب القسم ينطر نجي كنه خفير
أهتم له والا (الفجر) ضيعتها والله قهر
صار العمل ياللأسف عندي اهم منها بكثير
وحسيت صبحي باوله هم ومعه ضيقة صدر
شعور طير(ن) ماكفخ حدى جناحينه كسير
ومن زود مابي من تعب غفيت مقدر انتظر
ذي عادتي دايم كذا اخلي المكتب سرير
وفي غفوتي حلمت انا كنه بدا يوم الحشر
مانيب وحدي بالحشر وقفوا معي خلق(ن) كثير
وصرت اتخيل حالتي كني ميمم في قبر
بس اتحرا لا دخل منكر وجا جنبه نكير
وحسيت انا ان المسأله جد ونهايتها خطر
يارب خفف غربتي هذاك مثواي الآخير
ويوم ان صحيت الا كما مسجون مطلق من أسر
تخيلوا وش كبرها هالفرحه لذاك الأسير
هذا جزا من فاتته صلاته بليا عذر
يعيش يومه في كدر والاخره ماحاش خير
حبيبتي عهدن علي مخلف وعودك (يافجر)
ابا اتحرا لك وعد ماخلفك لو مهما يصير
شاعر المشاعر – راشد السكران