ســـالفتي مع الكــلب المسعـــور

انا أبوسلطان.. شاب مستقيم ساكن في بيت الوالد .. ومقيم مع الأهل من 23 سنه
اغلب وقتي في الاستراحه مع الشباب .. متقاطين 7 شباب في استرااحه ..

والأجار له 3 شهوور مطوف وكل يومين متلاقطين مع راعي الاستراحه
<<< تسنه يلمح على طراره
الاستــراحه يحدهـأ من الغرب ددسن منقلب وجنبه قطو ومن الجنوب يحدهـا هندي دايم واقف ومن الشمـال يحدهـا بقاله ماتبيع تتن ويحهـا الشرق رصيف. اضن الوصف واضح سيرو علينـأ



الاستراحه هذي عزيزه علي .. 23 ساعة ونصف يومياً فيهاا
لا طفشت من دنياي عسكرت بها ..

واذا حدتني ظروف الحياة وبغيت انقلب .. لجأت لها بعد الله وزال همي

::

خلوني بدااية ً اعطيكم نبذه عن ربع الاستراحه
مع تعريف صغير لكل وااحد :

سطاام (( رومانسي ويحب يسمع فطومه ))
سعد (( ولد نعمة ويتروش يومياً ))
ابوسعود (( ولد عمي وأعزهم على قلبي ))
ابوعذاب (( مسوي عربجي وحق عود وهو مو من جمبها ))
عبدالغني (( اسمراني نلقبه كرنتينا .. أحياان يتقبلهاا واحييان يستنزل علينا ))
حمووود (( قروي ابرز هواياته جمع الطوابع والعملات النادره والحش في خلق الله ))

والسابع محسووبكم .. أبوسلطان زعيم الجلسه

كلنا أعماارنا بالعشرينات ماعدا عبدالغني اللي عمره 31 سنه
كل ماسبق مقدمه قبل ماأتوطىء في بطن ام السالفه اللي راح اسردها لكم ..

_______________

مره من المرارير في ذاك اليوم لا بارك الله في ذاك اليوم ..
رجعت البيت الساعه 3 الفجر ..لقيت الباب مطرف ..
استغربت من اللي فاتحه هالوقت

دزيت الباب ودخلت .. وتوني جااي ( أديوور )) وأصك الباب :
هجم علي الوالد من خلف النخله .. وبحركه من حركات جاكي شان
سدد لي وحده بالصدر .. خلتني ألصق في الباب .. وأصكه بظهري ..

وقف قداامي .. ومعه معصااد الجريش ..
وقال: جاي بانصاف الليالي وريحتك بلوت !! <<<

قلت: روووقنا الله يجزااك خير لا تفضحناا .. فك و أفك

قال: شايفني بيبسي ابو نص ريال ..؟؟ (( الوالد ذباته مااااش ماهو عارف يعبر ))

مسكني من شعري وتلني وخلاني أوقف قداامه زي الألف أ أ أ
قال: هماني قايل لك احلق شعرك .. أنا اوريك ..

وحط رااسي بين سيقاانه ..
ومسكني من بطني ورفعني فوووق فووق هام السحب ..

متأثر باندرتيكر وهالمصارعه في دبي الرياضيه
ثم جيتك أمشي مليوون من فووووووووووق وعلى الأرض وآآه يا ظهري
قمت القط وجهي وبوكي ووجوالي وسبحتي الهلاليه ..

وقلت : الشرهه ماهيب عليكم .. الشرهه على اللي جاي يشوفكم ..
وطلعت زهقاااان .. وعلى وين يابو بوسلطان على وين ..؟؟
ما بدهااش .. مسك خطك للإستراحه
_______________ ____________

جيت الاسترااحه .. ولقيت حموود وابو خدره يشخروون

قمت افرفر في القنوات واناظر رسايل هالمرااهقين وأتحمد ربي :

** محمد وحشتني افتح جوالك ودق عليا <<< الظاهر جداويه
تررى بامووت قسم فقدتك ياقاسي
( حبيبتك لمااا قلي )

** عبدالغني الرياض..
ابي اتعرف على وحده رومانسيه وتسكن بالعليا <<< بيقابلها كعابي

** ميسوون الخبر:
ارجع ياكل الحب ارجع ياخلوودي مايصير كذا أنا مازعلت في حاجه


بصراحه طفشت منهم ..
فريت على الفضائيات الحكووميه .. وأثر البرامج الدينيه تدهر بهالفجريه ..!!
ولا صحوا الناس .. حطوا افلام واغاني ...

واذا نامواا.. حطوا برناامج فتااوي واحاديث !!!!

بيني وبينكم الدش مو صافي .. يقطع ..
والشاشه ترووح وتجي.. كل شوي ناقزه البحث عن الإشاره

قفلت التلفزيون وأخذت لي غفوة ..
جاني الهندي لقماان حق الاسترااحه معه كيس صاامولي يصحي فيني:
بابا سيف بابا سيف... قووم "سئوور يجي " ..

رفعت الكااب عن وجهي .. صكيته طرااق .. قلت اطلع من سمااي مانيب ناقصك

قال: والله سئوور يجي ..
ناظرت الدريشه : النور بدا يشقشق والدجاج يبقبق ( ياهوه يانزار بن هذال )
قلت له من هاللي جاي هالحزة !!

قال: سئوور كبير اسود
قلت: تكلم زين وش بك كأنك مقروص .. وهو يعيد علي نفس الجمله ..

قلت في نفسي : الله يرجه .. أكيد هالأسمراني جارنا منصور المغفل
جاي يبي زي العاده: سلف ملح .. وماجي وصلصه ..

وانا طالع .. صكيت باب الاسترااحه عشان مايدخل هالنشبه منصور
وانا قافله أخلاقي من بعد اللي صار لي مع الشايب

طلعت أناظر يمين .. يسار مالقيته .. وين راح منصور؟!!
قلت: أكيد ابطيت عليه ورجع استراحتهم ..
باروح له قبل يرجع ويصحيني وانا خرماان نوومه..

::

وهنا بدأت الحكاايه <<< بدري ياشيخ

المهم

مشيت !!
مشيت !!

وفجأة ..


وقفت بنص الشارع ..


ثم مشيت (( أخ يا اثارة هوليوود ))

والله وانا في الشارع والجو براد يتخلخل بين الضلوع سألت النفس :
وش جايبه منصور هالصبحيه .. ؟؟

هو وربعه العاده يجونا المغرب ويمشوون وحده الليل .. غريبه ..

وصلت استراحتهم لقيتهاا مقفله ولا فيه اي سيارة عند الباب
قلت .. الله يرجك يا لقماانووه ماعمرك جبت العلم صامل ..

ورجعت اعقاابي لأني نعساان
وانا مديووور .. لمحت زووول اسود كبييير ..!!!!

والله صاادق لقمااان !!

وبديت اجمع حبل غسيل افكااري وأتذكر الكلام اللي سمعته من يومين :
(( يقولون فيه كلب اسود مسعور "سئوور" يدووج بهالحواري الصااده ويعض وياكل خلق الله ))

بلعت ريقي اللي نشف ..
وأمعنت النظر .. <<< نظرات الصقور <<< أخس

والنتيجه:
فعلاً .. أخوكم ابوسطان أمام الكلب المسعوور وجهاً لوجه !!

** يقول الفيلسوف اليوناني غرم الله :
( أسوا شيء أن يداهمك الموت وانت لم تكتب وصيتك )

الكلب قدامي والأرض خلااا مابها احد ..
وعزرائيل مابيني وبينه الا ثوااني لا اكثر!!

قلت لنفسي : يابوسلطان حط رجلك لايتوحد فيك هالكلب !!

" بس المشكله اني صكيت باب الاسترااحه ..
وإذا نحشت من قدامه أكيد بيلحقني هالرخمه .. وعلى ما أطق الباب
وأنتظر حموود وخويه العربجي يصحوون ثم يفتحون ..

اكون وقتهاا نقانق بالمتبل الصيني في بطن هالمسعور

أقترب الكلب المسعوور مني !! صار وجهي بوجهه .. وعيني بعينه ..
ودمعت عيني ودمعت عينه كفاناا من زود الفرح هلت دمووع <<< مو وقته

للأسف .. من قراادة حظي .. ومن حسن حظ المسعوور ..
أني لما قررت الهرب .. لمحت الدلخ حموود وابو خدره فوق سطح الملحق يوازنون الدش !!
يبوون يلحقوون على برناامج المملكه هذا الصباح

لما شافوني وجهاً لوجه امام الكلب ..
قاموا يصفرون ويشجعون .. وصاار ابو خدره يطق في صحن الدش ويغني لي
وعبدالغني كل اللي اذكره انه استنزل على طق ابو خدره !!

.....

عااد انا زعيمهم واقواهم .. فمن العار أهرب أمامهم ..

وقررت المواجهه ( أخس يا بتال )

قلت في نفسي : الله واكبر يابوسلطان.. وش الكلب يعني ؟
مجرد قطو حجم عائلي ..!!

وش قطو .. الا فاار بس ( مورم حبتين )
اهجم عليه وخلك ذيبٍ أقشر (( الله من الهلوسه ))

بنفس الوقت .. سمعت لقماان الهندي هو وربعه .. مسوين راابطه ويغنوون لي :
بابا أبوسلتان ابو سلتان .. ياكلو
هبه هبه .. ياكلك ...
مع وااهد فلفل .. هم همممم

والسيارات على الطريق العام تتفرج .. والمرور كثف الزحمه ( الله من زين الوصف ))
والهلكوبتراات فوقي تبااشر النتائج ..

وانا والمسعوور قباال بعض وكل وااحد محترم خصمه
قبل ان اهجم .. نغزني قلبي ويوم ألتفت وراي

واثر ابو سعود ينزل من الكراسيدا حقته ..

ويجي مسرع نااصي مكاان المعركه ويصرخ :
كله الا ابوسلطان ( قايل لكم اعز وااحد على قلبي )) ..

جااء ابو سعود مكيم يمشي مليون نااصي الكلب ..

الكلب مطنش وببروودة دم لما وصله ابو سعود
سوى له حركه عشوائيه خاطفه ....

وابو سعود قداامي صار يخررر دم ( أفااااااا يابوسعود )

قام الكب يحك ظفووره .. وينفخ قذلته فوق عينه اليسرى

وناظر فيني وقالي :
هااه يالاطخم اسدحك جنب خويك .. ولا آكلك وأحط عضامك فوقه ؟! أختر ..
قلت : احذف الاجابتين بعدين هذا ما قد شفته ولا هوب خويي
( جحدت ابو سعود مسكين بس للضروره أحكام )

قامت اسنانه تصرصر من الحمااس ..

رحت مسووي زيه ..

ومن قوة الدوس على اسناني ..
أنكسر نابي وطاح قدامه في ارض المعركه !!

قعد ينااظر ابوسعود موهو يتلوى بالأرض ..
استغليت الفرصه .. وبحركه نابعه من تأنيب الضمير الانسيابي :

طمرت عليه وتشعبطت فوق ظهره .. وصفق لي الحضووور

قعدت اخنق فيه بحمااس ..
التفت علي ببرود .. وقال :
يالحبيب .. حمار عندك انا .. راكب ضهري !! .. توكل إستراحتكم لا أجرم فيك
وإذا براسك حب مانطحن أنزل وتطاق زي الآوادم ..

بصراحه أستحيت منه ونزلت وأنا متولم للنحشه ..
لكن انقلبت الأرض وصاارت سمااء ..
وصاارت رجلينه ويدينه في بطني وصدري .. ووجهي بوجهه ..

تذكرت بهالموقف رشدي اباضه ومديحه يسري ..
قلت له .. الله يستر من رومانسيتك

وفتح فمه وشفت انيابه .. أشهد ألا إله إلا الله
وأنقض على رقبتي ..

و ............. و .............

فاصل إعلاني
_______________ _



..............



عدنا ..!!




طبيت على ابوسعود وخميته من الخوف ..

وسمعته يسب ويلعن !!
وسمعت صووت بوووري معلق .. من الخرشه

لا أخفيكم سراً أيضاً سمعت صووت فراامل عنيف جداً ..
دفني ابو سعود .. وهدأ السرعه .. ووقف يمين الخط ..
والتفت علي وعيوونه حمراء معصب ..!!

عسى ما شر يابوسلطان.. بغيت تخلينا نجيب العيد في هالتريله اللي من شوي ..
فر
فت عيوني .. قلت : سلامات عسى ما شر وش صاير

قال : انت مدري وش سالفتك .. من مسكنا خط ابوحدريه وأنت حلوووم :
وتقول رد الكلب .. هات الكلب ...

وبالأخير طلع حلم في حلم
لابارك الله باللي ياكل شكشوكه من زوله بالخطوط

_______________ ______

يالربع ..

لا ينط لي وااحد منكم ويسأل اسئله طلاب إبتدائيه ويقول :
اصلاً يانصاب الكلب مايتكلم .. ههههههههههههههه ههههههه

حقوق الطبع والنشر والتأليف لدى ابــو ســلطـأن

جميع شخصيات الروايه حقيقيين ..
فقط السيناريو خراافي

ذبوا عليهم تراهم مايزعلوون .. ربعي ويحبوون اللي أحبهم م

مــــنــقــول <العــود الازرقـ:36_1_20 :