عنونوها كما تشاؤون (( فهي لكم))

صباح / مساء الخير

إن كان باقي للغلا فيني عروق =حرام لأنحر كل عرق ٍ يجيبك
انسى المودة والمراسيل والشوق=وأنسى بإني كنت لحظة حبيبك
يا أول أتراحي وياحزني الذوق= يامنتهى غايات منهو لجي بك
ولاك ربي في معاليقي تبوق=الهم فيني والهنا من نصيبك

كانت مقدمة خاصة بكم وإليكم قصيدة

(( حبة التّين ))

يا أول أزهاري يا حبة التين=كم لي زرعتك في دروب المعاناه
متى على الله يا حصاد البساتين =أطعم بك أفواه ٍ وأسكّت أفواه
ما مات بي عزم ٍ ولا كلّت يدين=ولا هدني ظلمك وترنيمة الآه
أخط بأوراقي عنا غربة سنين=وأشح بالباقي من الوقت لأرداه
اطرد سراب وأرتشف دمعة العين=وأصرخ بحملي يا عنا الوقت وش جاه
ما مرني طيفك ولا زارني لين=شابت قوافي رحلتي بالمناداه
استمطرك أرضي تعاني الأمرَّين=واستعطفك وأنتْ ما قلت لله
ماتت حروفي جَدب ما بلّها الطين=وآخر عروقي ما لقى قلب ينصاه
المشكلة مدري على وين ولوين=ولاّ متى ووشلون طيبك أبلقاه
الكون لله والسما والأراضين=مهما بدالك في حياتك من الجاه
ومدام صوتي ما عرف لك عناوين=خلّه يموت بصرخته لين أقصاه

أرجوا أن أكون قد وفقت في تقديم مايرقى لذائقتكم

دمتم بكل الحب