صدر الحزين يطاوع الضيق .. و يضيق=من كل صوب .. و تصبح العين ديمه
ينزل مطر .. و يلوح براق .. و تفيق=كل الجروح .. المبطيات .. القديمه
و أنا .. على الدنيا قليل التوافيق=ما غير أساوقها براي و عزيمه
يا فوح قلبي مثل فوح الاباريق=عليك ياللي لك عروقي محيمه
أقبلت لي و الحب .. حظ و توافيق=و أقفيت عني .. و النتايج وخيمه
علقت نفسك في زوايا المعاليق=و حطيت لك بين الحنايا .. وسيمه
و أصبحت عندي فوق كل المخاليق=تخطي و لا لك غير قدر و حشيمه
و انا و ربي ما نقضت المواثيق=لا زلت أشوفك راس مال و غنيمه
دونك سحاب الدمع و مشارق الريق=و عقبك ضياع و جرح قلب و هزيمه
فأن بعتني فالسوق بيع الصناديق=عز الله انك بعتني دون قيمه
ليتك تشوف ابواب قلبي مغاليق=ما هيب لا و الله .. و عادة حليمه
ما همني و الناس جمع و تفاريق=ما دمت منتب فيه روحي يتيمه
يا صاحبي تبكي عليك الطواريق=جزل البيوت .. الفاردات .. العديمه
أرحل .. و طيبك فوق روس الشواهيق=لا تلتفت لي يا قوي الشكيمه
و أنا على خبرك وريث المطاليق=راعي مواجيب و شجاعه و شيمه
مثل الجبل و أقرب مثل عندك .. طويق=شامخ .. لو ان الريح تنحت صميمه
يالله عسى فالك معزه و توفيق=ياللي جعلت أهداف عمري عظيمه
عقبك لي الله ثم شمس المشاريق=و الشرقي و هبّة هواه و نسيمه
و الشوق و هموم الجروح المفاتيق=و البرد و الحزن و شوارع رحيمه
يالغالي اللي كنك بقلبي اتويق=جرحك كريم .. و ذكرياتك كريمه
أنت و انا .. نشبه حضارات الأغريق=القوم راحوا .. و الحضاره مقيمه