اقبلت والبرق في عرض المخايل=والمطر يمطر وانا عذري سميني
والشتاء والبرد والمسرا هوايل=ماتحمل ياحياتي صدقيني
شاعرٍ يبغى الجمالة والجمايل=يوم جيتي بس قومي ونعشيني
الزمن محدود في كل الوسايل!!=اقربي والليل الاسود مقتفيني !!
لاتشب النار في روس الفتايل!!=ثم تطور من يسار ومن يميني
راح ليلي في المزوح وفي المحايل=برى حالي يوم بيحت الكنيني !!
باح سدي في اللقاء وقت الصمايل=الهوى والموت في نصف الجبيني !!
رحت فيها منتحر ضمن الاوايل=المهم انسى الشقا طول السنيني !!
لفني مابين ثغرك والجدايل=واسقني من مبسمك يانور عيني
جيدك الفتان والخصر يتمايل=والدلع والملح والعقل الرزيني!!
والعيون اللي بها حرب وقبايل=والنحر فيه العلامة شامتيني
شوفتك تبعد عن القلب الملايل=انت عندي صرت مثل الاكسجيني
سامحيني والعمر يازين زايل=بس طلبه لا بغيتي تتركيني
طمنيني عن حياتك بالرسايل=والغلا محفوظ مابينك وبيني
الوكاد !! انتي من خيار الاصايل=مهرةٍ تجرح قلوب العاشقيني !!