بعد الإنقطاع

السلام عليكم ورحمة الله وبركاته


تشرفت بمساجلة الشاعر الكبير / سعد بن تويم


فكانت هذه القصيده


أقول فيها /

البارح الليل كلّه عاويٍ ذيبه=لين أذن الصبح والعاوي بمرقابه
والقلب قامت هموم الوقت تسري به= همٍ تغدّى به وهمٍ تعشّى به
الوقت يفتل علينا روس أشانيبه=يضرس علينا طواحينه وبأنيابه
كثروا معاوينه وكثرة عذاريبه=وضاعت مفاتيح صندوقه ودولابه
الشاعر اليوم لاسمعه ولاهيبه=مثل المهرّج بتهريجه وبثيابه
بعض العرب ياسعد ماأقشر هناديبه=ماكان في خاطره عند العرب جابه
مايفتشل من علوم الشك والريبه=ولاهمّه اللي يهزبه ويتهزّى به
ولايستحي يومه يقدّم خجاعيبه=شعر الحداثه يحبّه ويتحدّى به
سبحان من كوّنه ياشين تركيبه=وجهه ووجه الردى بالحيل متشابه
الثوب ضيّق ومزنوطه لغابيبه=وثوب النجاسه ترى ماينتصلّى به
لاهوب من عزّه ولاهوب من طيبه=فالطيب والله فلا أظن يتهقوى به
عن المواجيب غايبةٍ مواجيبه=فالموقف الصعب ماأحدٍ يحسب حسابه
لاأحدٍ يرحّب به ولاأحدٍ يهلّي به=بين النشاما حضوره كنّه غيابه
ماهوب حرٍ يعشنّه مخاليبه=غراب لوطال منقاره ومخلابه
يابومحمد مثل هذا شسوّي به=لابوه لابو من اللي ياسعد جابه
أحرّك الجمر وألحّق مشاهيبه = وألاّ أترك الجمر يطفي وأترك أسبابه
تراك رجلٍ صريح ورايك أمشي به=مثل الجدي ساري الليل يتقدّى به
ياسيفنا اللي على العدوان نصطي به=والسيف من حدّه وعزّه من نصابه
الشعر في موقف الشعار ترهي به=لاجاء مجال التحدّي وانفتح بابه
ولولاك علم والوفى والطيب تحري به=ماقلت فيك القصيد وجاك بكتابه

ورد علي أبو محمد وقال /

الشاعر اللي عطيبات مضاريبه=حر ٍ يفج النحور العوج مضرابه
شاعر ومبدع وتعجبني مكاتيبه=أي والله اني اعزه واتعزوابه
واشفق على شوفة الطيب واساليبه=مادام يتعب على المعنى وهندابه
لا طب سوق القصيد الجزل ياتي به=يطرق بحور القصيد ويطرق ابوابه
على الرفاقه بعيدات ٍ محاضيبه=وعلى العدو في نهار الضيق يدعى به
وياناصر الوقت فازت به قصاصيبه=ناس ٍ تجمع حكي فاضي ونصابه
الشعر وضعه تدهور وانفرى جيبه=عان الضراوي جرد سيفه ومشعابه
قام يتفلسف وسوق الهزل يشري به=ينقد على الناس والمنقود يسعى به
شعر الحداثه يهابد به ويومي به=سيله نحاوي وحنا مادرينى به
يمرض به كبود خلق الله ويذّي به=بصياحه اللي خطير ٍ يفقد اعصابه
يفتل عضلاته وشعره يبابي به=عقله اصغير وشكله شكل دبابه
ماله رصيد ٍ مع الشعار يغزي به=مفلس ودايم يشيل العيب في جرابه
والشعر هذا خسارة جهد ومصيبه=جعل العدو لاحتم الميدان يبلى به
والخبل لاجاء مجاله قيل والخيبه=وبين الشواعير والله ماحسبنابه
قطع به الوقت تشريقه وتغريبه=واليا جلس معك ملزومٍ تلهّى به
لابد الايام والاقدار تقفي به=واخير من لمسته حاول تجنابه
وان اعترض في طريقك مع مناديبه=وقام يتبجح ضعيف الراي باحزابه
ماله دواء كود تكسر له مشاعيبه=وتكويه بالنار في العلبا بمركابه
وان جنبك جنبه والناس تدريبه=خله لحاله مع الجاثوم يغدى به
واللي مثل حضرتك دايم نماري به=لاجاء مجال القصيد وعدوا أصحابه