أنا يالشنيفي زاد همي على بلواه = بعيد عن الديره ولا في يدي حيله
تهل العيون دموع دم على طرياه = وعليه أتوجد مير ما في يدي حيله
مغير أتقلب كن قلبي على ملاه = تمنيت أشوفه مير ما في يدي حيله
عسى الله يعين القلب يصبر على بلواه = براني بحبه مير ما في يدي حيله
غرير على قلبي تربع وأنا ما أقواه = أخاف اجرح إحساسه ولا في يدي حيله
جماله سحر هاروت سبحان من سواه = عليه الحشاء يقرع ولا في يدي حيله
تكلم بمنطوق يتل الحشاء بقصاه = وأقوم اتعزوى مير ما في يدي حيله
زماء في حشاه بيض قمري على مبداه = عليها مريض الحال ما قي يدي حيله
نهيت الجوارح مير قلبي عجزت أنهاه = خلاص انطبع حبه ولا في يدي حيله
جديلة على متنه وغره وحلو أشفاه = ويا طي حالي طي ولا في يدي حيله
ألا ياعود الموز حالي ترى تبراه = تمايل إلى جيتك ولا في يدي حيله
تراي المريض اللي ملكته وعطه دواه = وترفق بحالي مير ما في يدي حيله
انا لو نهوني يالشنيفي فنا ما أنساه = رهين العيون السود ما في يدي حيله
ثلاثين مره جيت بيته ولا شفناه = أبي القرب منهم مير ما في يدي حيله
آلا يا بعد حالي تصدق لوجه الله = وعطني لوجه الله ما في يدي حيله

هلا بالعتيبي كل قاف نبي نبداه = علشان مرسولك ولا في يدي حيله
تشكي تقول القلب فيه السهم مخطاه = هذا فعل خلانك ولا في يدي حيله
عيونك تهل الدمع كله على فرقاه = عسى الله يعينك مير ما في يدي حيله
تصبر لعل الوقت يسعدك في لاماه = لعله نصيبك مير ما في يدي حيله
ترى القلب ما يعذل ويصبر على ما جاه = حياته وليفه مير ما في يدي حيله
عسى الله يعين اللي من العام في عمياه = تصافق هبوبه مير ما في يدي حيله
ولو قلت مهما قلت قولي على معناه = فجعني زماني مير ما في يدي حيله
على اللي الى مني تراجعت في ذكراه = تزايد همومي مير ما في يدي حيله
عنود خذت قلبي وقلبي يعيش احماه = أمانه بكفه مير ما في يدي حيله
أنا وين ابلقى في العرب مثله وحلياه = لطيف الحشا نادر ولا في يدي حيله
ملكني بحبه ملك والحال ما تخفاه = رعاه الله الوالي ولا في يدي حيله
وتقبل بيوتي رد لبيوتك المهداه = ولا في يدي حيله ولا في يدك حيله