قصيدة المغذي- للشاعر/ فهد بن عبدالعزيز الفايز

#1 (**permalink**) 15-12-2007, 03:52 PM

السلام عليكم ورحمة الله وبركاته
--------------------------------------------------------------------------------

هذي قصة طريفه صارت للشاعر (( فهد بن عبدالعزيز الفايز )) - وهو من الشعراء المعاصرين - من النواصر من بني تميم .

حس الشاعر فهد الفايز بألم في صدره وزادت ضربات قلبه على غير العاده وهو في مكتبه في الشركة. أخذه واحد من زملاءه لأحد المستشفيات الأهليه كشفوا عليه وسوا له تحاليل والذي منه وحطوه في غرفه وقالت له الممرضه بنجيب لك ( المغذي) ولا عليك إن شاء الله إلا العافيه ، والمغذي جارورة كبيرة وفيها محلول مثل الماء. غرزت الممرضه الأبره بظهر كفه الله يجيركم وفتحت قارورة المغذي .رفع راسه شاعرنا وشاف المغذي ينقط نقطه نقطه تضبط عليها دقات الساعه . وراحت الممرضه وسكرت الباب .
بدا شاعرنا يهوجس وجاه ابليس يوسوس له ويقول له .: ياهو شي ينخاف منه بيجي لك هبوط في القلب أو انخفاض بالضغط وسحبه لذكر الموت واللي بعد الموت الله يدفع البلا المغسلة واللي بوسط المغسلة والحنوط وعقبه الكفن وثم يشيلونه على النعش ويصلون عليه وعقب يودونه المقبرة يدفنونه .. وتم بهالهواجيس .

شوي والا الباب ينفتح والا الدكتور جاي وشاف نتايج التحاليل وتخطيط القلب والأشعه وقال له :
أبشر تطمن ابد ماعليك إلا العافيه وإنك مثل الحصان بس بنخليك عندنا شوي وبكره ان شاء الله تروح على طول المكتب وخذ هالعلاج انا كاتبه لك واذا مافيك نوم ترا عندنا كتب شعر وغيرهم ومير شوف المصحف اقرا فيه .

عاد شاعرنا قال هالأبيات عن الحال اللي مر فيه :

شــفت المـغذي فــوق راسي ينقط
~~~~~~ نقــطه ورا نقـــطه ينــقّط نــقوطي
لـــيّه يـــــروّع مـــثل داب مـــرقط
~~~~~~ و إلا مــثل كــفّ يــــلوّح بـسوطي
و الإبــرة بـكفي مـثل ريـشة الخـط
~~~~~~ وإلا مثل مصّاص في وسط قوطي
مع الهواجس رحت في شيل وحط
~~~~~~ اخـاف مـن قـلب يصيبه هـبوطي
ذكـرت مـوت قـاعد لي على الخط
~~~~~~ والمغسلة فيها الكفن والحنوطي
ومساحة أرض ما رسمها مخططّ
~~~~~~ ببـلاش لا صـك و لا بـه شروطي
و جـاني طبيب و قـال كلش مضبّط
~~~~~~ ارتح وخـذ لك هالعلاج مخلوطي
و إنسـى الهموم و خلّـها لا تسـلّط
~~~~~~وافتح كتاب الله وشرح السيوطي
و اقر دواويـن الشـعر كـود تنـشّط
~~~~~~ و الا لـطه حسـين و المنفــلوطي
تـرا حـلاة العـمر ساعة بـها بسـط
~~~~~~ و الله غـفور و لا يصيـبك قنوطي

وهذه قصة المغذي ، والواجب الانسان يتكل على الله ولا تلعب بقلبه الهواجيس.ويحتسب الأجر من الله.

سلامتكم وتعيشون

م ن ق و ل

#2 (**permalink**) 15-12-2007, 03:59 PM

قصيدة جميله جدا اخي

رائع في اختيار مواضيعك

اختك

حلا

#3 (**permalink**) 15-12-2007, 04:25 PM

صح لسانك ولسان الشاعر

اختيار رائع وموفق

بارك الله فيك

#4 (**permalink**) 15-12-2007, 04:45 PM

قصيده جميله

صح لسانك ولسان شاعرها

شكرا لك ومقصرت

#5 (**permalink**) 21-01-2008, 09:46 PM

صح السان الشاعر وسلمت يمناك عبدالله

حلووو كثيير

يعطيك العافيه ماقصرت،،

وفا

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصيدة (( الزاهده )) للشاعر / مسلط بن حسن العتيبي	سلطان الشوق	صهيل القصيد	10	22-09-2009 03:19 AM
قصيدة للشاعر الدرم	سمو الاحساس	صهيل القصيد	8	03-02-2009 10:22 PM
قصيدة (( الموعظه )) للشاعر / مسلط العتيبي	مسلط العتيبي	نشيد الروح	14	28-08-2008 06:55 PM
قصيدة الحب للشاعر: مازن دويكات	مازن دويكات	نشيد الروح	17	28-02-2008 03:33 PM
"متولعٍ برضاك" للشاعر عبدالعزيز بن سعود	محمد	صهيل القصيد	10	27-01-2008 07:14 PM

قصيدة المغذي- للشاعر/ فهد بن عبدالعزيز الفايز

حكايات من الوجد